Հայտնի է՝ Բելառուսում երբ տեղի կունենան նախագահական ընտրությունները

Բելառուսի Հանրապետության նախագահի ընտրությունները նշանակված են 2025 թվականի հունվարի 26-ին։ Այս որոշումն ընդունվել է Ներկայացուցիչների պալատի նիստում, հաղորդում է ԲԵԼՏԱ-ն։

«Համաձայն Բելառուսի Հանրապետության Սահմանադրության 81-րդ հոդվածի, Ընտրական օրենսգրքի 56-րդ հոդվածի՝ Բելառուսի հանրապետության նախագահի ընտրությունները նշանակված են Ներկայացուցիչների պալատի կողմից ոչ ուշ, քան հինգ ամսվա ընթացքում, և անցկացվում են կիրակի օրը։

Բելառուսի Հանրապետության Սահմանադրության 83-րդ հոդվածի համաձայն՝ նախագահն իր լիազորությունները ստանձնում է նախորդ նախագահի լիազորությունների ավարտից հետո ոչ ուշ, քան երկու ամսվա ընթացքում։ Ըստ Կենտրոնական ընտրական հանձնաժողովի՝ Բելառուսի Հանրապետության նախագահի ընտրությունների անցկացման օպտիմալ ժամկետը 2025 թվականի հունվարի 26-ն է»,- ընդգծել է Կենտրոնական ընտրական հանձնաժողովի նախագահ Իգոր Կարպենկոն։