Պետք է ստեղծվի անկախ Պաղեստին պետություն. Պուտին

Մերձավոր Արևելքում հակամարտության կարգավորմանը պետք է հասնել ընդհանուր ճանաչված միջազգային իրավական հիմքի վրա, որն ուղղակիորեն նախատեսում է Իսրայելի հետ խաղաղ գոյակցող անկախ Պաղեստին պետության ստեղծում։ Այս մասին հայտարարել է ՌԴ նախագահ Վլադիմիր Պուտինը` ելույթ ունենալով Կազանում «ԲՐԻԿՍ+/աութռիչ» գագաթնաժողովի շրջանակում։

«Անհրաժեշտ է դադարեցնել բռնությունը և կենսական օգնություն ցուցաբերել տուժածներին։ Պաղեստինի ժողովրդի դեմ պատմական անարդարությունների ուղղումը կարող է երաշխիք լինել Մերձավոր Արևելքում խաղաղության համար: Քանի դեռ այս հարցը չի լուծվել, հնարավոր չի լինի ճեղքել բռնության արատավոր շրջանակը»,- ​​ասել է պետության ղեկավարը։

Նրա կարծիքով, պաղեստինյան տարածքներում խաղաղության և կայունության վերականգնման հիմնական պահանջը «երկու պետությունների բանաձևի իրականացումն է, որը հաստատվել է Անվտանգության խորհրդի և ՄԱԿ-ի Գլխավոր ասամբլեայի բանաձևերով»։

Պուտինը հիշեցրել է, որ պաղեստինա-իսրայելական դիմակայության հերթական փուլը դարձել է ամենաարյունալիներից մեկը։

«Գազայի հատվածում մարտերի արդյունքում զոհվել է ավելի քան 40 հազար մարդ, որոնց մեծ մասը խաղաղ բնակիչներ են։ Բայց միևնույն ժամանակ մենք միշտ դեմ ենք ցանկացած ահաբեկչական դրսևորման։ Գազայում մեկ տարի առաջ սկսված մարտերն այժմ տարածվել են նաև Լիբանանում: Տուժել են նաև տարածաշրջանի այլ երկրներ: Իսրայելի և Պաղեստինի միջև առճակատման աստիճանը կտրուկ աճել է. «Այս ամենը շղթայական ռեակցիա է հիշեցնում և ամբողջ Մերձավոր Արևելքը դնում է լայնամասշտաբ պատերազմի շեմին»,- ընդգծել է նա։

Ռուսաստանի ղեկավարը հավելել է, որ փախստականների թիվն արդեն անցել է 1,5 միլիոն մարդու սահմանը։ Բացի այդ, վնասներ են հասցվել ենթակառուցվածքներին և բնակելի շենքերին, դպրոցներին, հիվանդանոցներին, սոցիալական հաստատություններին, ավերածությունները շարունակվում են։

«Մենք միշտ ձգտել ենք մեր նշանակալից ներդրումն ունենալ Մերձավոր Արևելքի կայունացման գործում, և այլ գործընկերների հետ էսկալացիայի հենց սկզբից ակտիվորեն ներգրավված ենք եղել կարգավորմանն ուղղված ջանքերում»,- եզրափակել է ՌԴ նախագահը։