Վրաստանի նոր խորհրդարանի առաջին նիստը տեղի կունենա նոյեմբերին. Շալվա Պապուաշվիլի

Վրաստանի խորհրդարանի նախագահ Շալվա Պապուաշվիլին հայտնել է, որ մինչև նոյեմբերի կեսերը երկրի Կենտրոնական ընտրական հանձնաժողովը կհրապարակի ամփոփիչ արձանագրությունը, իսկ Սահմանադրությամբ նախատեսված 10 օրվա ընթացքում նոր խորհրդարանը կգումարի իր առաջին նիստը, հաղորդում է Վրաստանի Առաջին ալիքը։

«Ավելի վաղ տեսանք միջանկյալ զեկույցը, որն ընդգրկում էր նախընտրական շրջանը, և տեսանք, որ զեկույցում նախընտրական շրջանը բնութագրվում էր որպես հանգիստ, երբ բոլորը հնարավորություն ունեին քարոզչություն իրականացնել հավասար պայմաններում։ Այսօր խոսքը վերաբերում էր վերջին երկու շաբաթվան, հատկապես ընտրությունների օրվա մասին, և ԵԱՀԿ/ԺՀՄԻԳ-ի կողմից տեսանք հիմնական եզրակացությունները հենց ընտրությունների վերաբերյալ։ Այսպիսով, անշուշտ, այն հարցերը, որոնք բարձրացրել էին ընդդիմության որոշ ներկայացուցիչներ ընտրությունների օրինականության վերաբերյալ, այլևս չկան»,- հայտարարել է Վրաստանի խորհրդարանի նախագահը։

Ըստ նրա, բոլոր նրանք, ովքեր մասնակցել են այս ընտրություններին, «քիչ թե շատ դա անվանեցին հանրաքվե, և այս հանրաքվեն կայացավ, վրաց ժողովուրդն իր վճիռը տվեց՝ աջակցելով երկրի խաղաղ զարգացմանը, որպեսզի ապահովի նրա բարեկեցությունը և որպեսզի Վրաստանը զարգանա Եվրոպայի ուղղությամբ՝ խաղաղ, արժանապատիվ և բարեկեցիկ կերպով անդամակցելով Եվրամիությանը»։

«Եվս մեկ անգամ շնորհակալություն եմ հայտնում բոլոր նրանց, ովքեր մասնակցել են այս ընտրություններին։ «Վրացական երազանքը» փաստացի կրկնեց 2012 թվականի արդյունքները, ինչը կրկին վկայում է այն մասին, որ դրանք սկզբունքային ընտրություններ էին մեր քաղաքացիների համար, և նրանք սկզբունքային որոշում կայացրին։ Այժմ ընտրական հանձնաժողովում գործընթացներ են ընթանում, կավարտվեն հաշվարկը և բողոքների հետ կապված այլ գործընթացները։ Նոյեմբերի կեսերին արդեն կլինի Կենտրոնական ընտրական հանձնաժողովի վերջնական արձանագրությունը, և Սահմանադրությամբ սահմանված 10-օրյա ժամկետում խորհրդարանը կգումարի իր առաջին նիստը»,- ասել է Շալվա Պապուաշվիլին։