Եղիշե Կիրակոսյանը նեղացել է. ցանկանում է լքել երկիրը

Հոկտեմբերի 29-ին Քաղաքացիական պայմանագիր (ՔՊ) կուսակցության վարչությունը վերջապես ընտրեց արդարադատության նախարարի թեկնածու, և Գրիգոր Մինասյանին պարտադրված հրաժարականից մեկ ամսից ավելի անց արդարադատության նախարար կլինի գլխավոր դատախազի գործող տեղակալ Սրբուհի Գալյանը։

Հիշեցնենք, որ Սրբուհի Գալյանը համակարգում է դատախազության` ապօրինի ծագում ունեցող գույքի բռնագանձման վարչության աշխատանքները:

Վարչության նիստի նախօրեին նախարարի ֆավորիտ թեկնածուն Միջազգային իրավական հարցերով ՀՀ կառավարության ներկայացուցիչ Եղիշե Կիրակոսյանն էր, ում թերևս խոստացվել էր, որ հենց ինքը կլինի նախարար, այլապես դժվար Եղիշե Կիրակոսյանը գար, մասնակցեր ՔՊ վարչության նիստին, սպասեր, որ իր զարգացման ծրագիրը հավանության կարժանանա, ասենք, Արփի Դավոյանի կողմից, ու վերջում ստանար 0 ձայն: Իրական ողբերգությունը հենց Եղիշե Կիրակոսյանի՝ ՔՊ վարչության նիստին ներկա գտնվելն էր:

Ինչևէ, 168.am-ի տեղեկություններով՝ Եղիշե Կիրակոսյանը վաղուց է դժգոհ իր տեղից ու դիրքից ու մոտ 2 ամիս առաջ անգամ Նիկոլ Փաշինյանին ասել է, որ ուզում է հեռանալ, և ի զարմանս իրեն՝ ստացել է պատասխան, որ եթե ուզում է, կարող է գնալ, իր գործն է:

Եղիշե Կիրակոսյանն անակնկալի է եկել այդ պատասխանից ու սկսել է նոր աշխատատեղի փնտրտուքները: Մեր տեղեկություններով՝ վերջերս նրա ամերիկյան այցը հենց այդ նպատակն է ունեցել:

Միջազգային իրավական հարցերով ՀՀ կառավարության ներկայացուցիչն Ամերիկայում դիմել է նաև փաստաբանների դպրոց: Ցանկանում է ստանալ փաստաբանի ամերիկյան արտոնագիր: Այսինքն՝ իր ապագան Եղիշե Կիրակոսյանը տեսնում է Հայաստանից դուրս՝ ԱՄՆ-ում:

Մեր տեղեկություններով, սակայն, Նիկոլ Փաշինյանն անձամբ է Եղիշե Կիրակոսյանին առաջարկել արդարադատության նախարարի պաշտոնը, և վերջինս, ինչպես 168.am-ը գրել էր, անգամ պայման էր առաջ քաշել՝ իր համաձայնությունը տալու համար, որն էլ Փաշինյանն ընդունել էր: Սակայն վերջին պահին Փաշինյանն իր սովորության համաձայն՝ գցել էր Եղիշե Կիրակոսյանին ու իր նախապատվությունը տվել Սրբուհի Գալյանին:

Եղիշե Կիրակոսյանը, թերևս, հիմա ավելի մեծ էնտուզիազմով ձեռնամուխ կլինի իր հետագա աշխատավայրի հետ կապված հարցերն օր առաջ կարգավորելու համար: