Բորելը ժամանել է Կիև

Եվրամիության դիվանագիտության ղեկավար Ժոզեպ Բորելը X-ի իր էջում հայտնել է, որ ժամանել է Կիև։ «Սա իմ հինգերորդ այցն է Կիև»,- գրել է նա։

Նա նաև նշել է, որ սա կլինի իր վերջին այցը ԵՄ դիվանագիտության ղեկավարի պաշտոնում։

Հրապարակված լուսանկարում Բորելին դիմավորում են կայարանում։

Նախօրեին Բորելն ասել էր, որ առաջիկա օրերին կայցելի Ուկրաինա՝ քննարկելու Կիևին հետագա աջակցությունը ԱՄՆ նախագահական ընտրություններում Դոնալդ Թրամփի հաղթանակի ֆոնին։ Բորելի խոսքով՝ եվրոպական երկրները Թրամփի հաղթանակից հետո կանգնած են մի սցենարի առաջ, որտեղ եվրոպացիները «պետք է միասնականություն ցուցաբերեն գլոբալ մարտահրավերներին դիմակայելու համար»։

The Wall Street Journal-ը գրել է, որ ԵՄ երկրների ղեկավարները մտածում են Ուկրաինային օգնություն տրամադրելու մասին՝ առանց ԱՄՆ-ի մասնակցության։ Ըստ հրատարակության՝ եվրոպացի քաղաքական գործիչները առաջին անգամ սկսել են խոսել այն մասին, թե արդյոք ԵՄ-ն կարող է օգնել Ուկրաինային առանց ԱՄՆ-ի աջակցության՝ Դոնալդ Թրամփի՝ երկրի նախագահ ընտրվելուց հետո, չնայած այն բանին, որ նրանք փորձում են համոզել Թրամփին չկրճատել օգնությունը Կիևին։