Պետք է հավատանք մեր հավաքական ուժին, որպեսզի կարողանանք նվիրումով պահպանել պետականությունը․ Թաթոյան

2025 թվականի շեմին հանուն մեր հերոսների հիշատակի, նրանց սխրանքների ու ծնողների հանդեպ ունեցած մեր նվիրական պարտքի, հանուն մեր երեխաների ապահով կյանքի և զորեղ Հայրենիքի՝ մենք պարտավոր ենք ոտքի կանգնել ու շարժվել առաջ, գրում է ՀՀ նախկին ՄԻՊ Արման Թաթոյանը։

«Չպետք է վախենանք դժվարություններից. մենք ունենք հույս և նպատակ: Հույսը վախից զորեղ է, այն մեզ ուժ է տալիս, իսկ նպատակը շարժիչ ուժն է։

Ժամանակն է, որ մաքրենք քարերը մեր ճանապարհից ու վեր ելնենք մեր հաջողության լեռները թողնելով փորձությունների հորձանուտը։ Մենք այն ժողովուրդն ենք, որը բարձրանում է, կառուցում է և վերականգնում, կերտում է և վերածնվում ու իրար ուժ տալով գնում առաջ։

Մենք չպետք է թույլ տանք, որ ցավը թուլացնի մեզ և մեր մեջ սերմանի անճարության ու անկարողության կործանարար զգացումը։ Մենք չպետք է թույլ տանք, որ ինչ-որ մարդիկ հանուն իրենց անձնական շահերի կամ պաշտոնների, վնասեն մեր նվիրական արժեքներն ու պետականությունը և համոզեն, թե հույսը մարել է։

Պետք է հավատանք ինքներս մեզ և մեր հավաքական ուժին, որպեսզի կարողանանք նվիրումով պահպանել պետականությունը. միայն մեր Հայաստանում կարող ենք ապրել ապահով և արժանապատիվ` հայի իրական ինքնությամբ:

Շնորհավորում եմ Նոր՝ 2025 թվականը։

Թող այս տարին բերի խաղաղություն և ուժ բոլորիս ու մեր Հայրենիքին»։