Խաբիբ Նուրմագոմեդովին հեռացրել են ամերիկյան ինքնաթիռից (տեսանյութ)

Խառը մենամարտերի ռուսաստանցի մարտիկ և UFC-ի նախկին չեմպիոն Խաբիբ Նուրմագոմեդովը հեռացվել է «American Airlines» ավիաընկերության թռիչքից դեպի ԱՄՆ՝ բորտուղեկցորդուհու հետ վիճաբանությունից հետո։ Թեև մարզիկը չի բղավել և չի վիրավորել անձնակազմի անդամներին, նա պարզապես չի հասկացել, թե ինչու են իրեն խնդրել տեղափոխվել։

Ինչպես հայտնում է e2gsports.com պորտալը, MMA լեգենդին տեղ են հատկացրել վթարային ելքի մոտ։ Կանոնների համաձայն՝ նման նստատեղ զբաղեցնող ուղեւորը պետք է պատրաստ լինի արտակարգ իրավիճակների դեպքում օգնություն ցուցաբերել մարդկանց։

Բորտուղեկցորդուհին մոտեցել է Խաբիբին և հարցրել՝ պատրա՞ստ է արդյոք կատարել այդ պարտականությունը։ Բայց մարզիկն, ամենայն հավանականությամբ, ամբողջությամբ չի հասկացել նրա խոսքերը և ճշգրիտ չի պատասխանել: Բորտուղեկցորդուհին իր հերթին չի հասկացել, թե արդյոք Խաբիբը կօգնի տարհանել ուղևորներին արտակարգ իրավիճակների դեպքում, և հետևելով հրահանգներին՝ խնդրել է նրան փոխել նստատեղը թռիչքի ժամանակ։

Խաբիբը վրդովվել է դրանից և պահանջն անվանել «անարդար»։ Արդյունքում անձնակազմը մարզիկին խնդրել է լքել ինքնաթիռը։