Բեռլինում հասարակական տրանսպորտի աշխատակիցները 24-ժամյա գործադուլ են հայտարարել

Գերմանիայի մայրաքաղաքում ընթանում է Բեռլինի տրանսպորտային ասոցիացիայի (BVG) աշխատակիցների նախազգուշական գործադուլը։

Ինչպես հայտնում են ԶԼՄ–ները, գործադուլն սկսվել է ժամը 03:00-ին (Երևանի ժամանակով 06:00-ին) և կշարունակվի մինչև հաջորդ օրը ժամը 03:00-ն (Երևանի ժամանակով 06:00-ն):

Ինչպես նշում է «BVG»-ն, մետրոն չի գործի Բեռլինում, իսկ տրամվայներն ու ավտոբուսները չեն գործի երթուղիների մեծ մասում։ Գործադուլը չի ​​ազդի շրջանային եւ մերձքաղաքային գնացքների վրա։ Ուղեւորների համար գործադուլի հետեւանքները մեղմելու նպատակով Բեռլինի որոշ շրջաններում կգործեն լրացուցիչ քաղաքային էլեկտրագնացքներ։

Գործադուլի կոչն արել է «Verdi» սպասարկման ոլորտի աշխատողների արհմիությունը։ Այն պահանջում է աշխատավարձի բարձրացում ամսական 750 եվրոյով «BVG»-ի մոտ 16000 աշխատակցի համար։