ՄԱԿ-ը խոսել է Ուկրաինայում հրադադարի վերահսկման սցենարների մասին

Ուկրաինայում հրադադարի ռեժիմի պահպանման ստուգումը կարող է կազմակերպվել ՄԱԿ-ի կամ մի քանի պետությունների կողմից, բայց միայն հակամարտության երկու կողմերի համաձայնության դեպքում: Այս մասին El Pais թերթին տված հարցազրույցում հայտարարել է ՄԱԿ-ի գլխավոր քարտուղարի՝ խաղաղապահ գործողությունների գծով տեղակալ Ժան Պիեռ Լակրուան։

«Դժվար չէ պատկերացնել հրադադար, որը կարող է ուղեկցվել մի քանի սցենարով. ստուգումը կարող է իրականացվել մի քանի պետությունների կամ ՄԱԿ-ի կողմից: Իհարկե, անհրաժեշտ է համաձայնագիր երկու կողմերի միջև», - ասել է նա։

Լակրուան ընդգծել է, որ «հրադադարի պահպանման ստուգման մեխանիզմը կպահանջի ՄԱԿ-ի Անվտանգության խորհրդի միջազգային մանդատը»: