Ֆրանսիան Ուկրաինայի և Մոլդովայի սահմանին գործողություններ է նախատեսում Ռուսաստանի դեմ․ Le Figaro

Ֆրանսիացի զինվորականները քարտեզագրում են Ուկրաինայի և Մոլդովայի հետ Ռումինիայի սահմանի երկայնքը՝ ՆԱՏՕ-ի և Ռուսաստանի միջև հնարավոր բախման դեպքում։ Այս մասին գրում է Le Figaro թերթը։

Պարբերականի տեղեկություններով՝ անցյալ տարի Ռումինիա են ժամանել Ֆրանսիայի ցամաքային զորքերի 28-րդ առանձին զորամասի զինծառայողները, որը հանրապետությունում ռազմական տեղագրողների միակ ստորաբաժանումն է։ Le Figaro-ն պնդում է, որ իրենք այնտեղ են՝ տարածքը հետախուզելու՝ քարտեզները թարմացնելու համար:

Ինչպես գրում է Le Figaro-ն, զինվորականները հատուկ ուշադրություն են դարձրել Ֆոկսանի դարպասի քարտեզագրությանը, որը միջանցք է Կարպատների ստորոտների ու Դանուբի միջև։ Այս վայրը, ըստ ՆԱՏՕ-ի, կարող է օգտագործվել ռուսական բանակի կողմից ենթադրյալ հարձակման համար:

Ինչպես նշել է ստորաբաժանման հրամանատար, գնդապետ Գիյոմ Շմիդտը, մարտական ​​պայմաններում բանակը պետք է պատրաստ լինի շարունակել գործողությունները՝ նույնիսկ եթե արբանյակային ազդանշանները ճնշվեն։

«Դաշնակիցներին անհրաժեշտ էր թարմացված տեղեկատվություն սպասվող մարտադաշտի մասին»,- պարզաբանել է ֆրանսիացի գնդապետը։