Հյուսիսային Կորեան զգուշացրել է՝ ԱՄՆ-ի «ռազմական բլեֆը» բացասական հետևանքներ կունենա

Հյուսիսային Կորեայի պաշտպանության նախարարությունը զգուշացրել է, որ ԱՄՆ-ի և Հարավային Կորեայի զորավարժությունները տարածաշրջանում ամերիկյան B-1B ռմբակոծիչների մասնակցությամբ իրենց համար բացասական հետևանքներ կունենան։

Պաշտպանության նախարարության հայտարարությունը հրապարակել է Կորեայի կենտրոնական լրատվական գործակալությունը:

Հյուսիսային Կորեայի գերատեսչությունն ընդգծել է, որ «ԱՄՆ-ի բլեֆային ռազմական գործողությունները» վտանգ են ներկայացնում երկրի ինքնիշխանության և թերակղզու իրավիճակի համար։ Փհենյանը «ճնշող զսպման միջոցների կիրառմամբ» կստիպի Վաշինգտոնին գիտակցել, որ ԿԺԴՀ-ի դեմ սադրանքների մակարդակի բարձրացումը կհանգեցնի Միացյալ Նահանգների համար վտանգի բարձրացման:

«ԿԺԴՀ-ի զինված ուժերը ոչ մի դեպքում թույլ չեն տա թշնամական ուժերին չնչին վտանգ ներկայացնել պետության ինքնիշխանությանն ու անվտանգությանը և կկիրառեն հզոր ուժ՝ զսպելու Միացյալ Նահանգների ագրեսիվ մտադրությունները»,- ասվում է հայտարարության մեջ։