Պակիստանը փակել է օդային տարածքը Հնդկաստանի համար

Պակիստանը փակել է իր օդային տարածքը հնդկական ավիաընկերությունների համար Քաշմիրում վերջերս տեղի ունեցած հարձակումից հետո, որի հետևանքով զոհվել է ավելի քան 20 մարդ, ինչի համար Հնդկաստանը մեղադրում է պակիստանցիներին: Այս մասին հայտնում է Reuters գործակալությունը։

«Մտահոգություն հայտնելով զբոսաշրջիկների կյանքերի կորստի կապակցությամբ՝ կոմիտեն դիտարկել է 2025 թվականի ապրիլի 23-ին Հնդկաստանի կողմից հայտարարված միջոցառումները և դրանք համարել միակողմանի, անարդար, քաղաքական դրդապատճառներ ունեցող, ծայրահեղ անպատասխանատու և իրավական արժանիքներից զուրկ», – մեջբերում է լրատվամիջոցը հատված Պակիստանի վարչապետ Շեհբազ Շարիֆի հայտարարությունից, որն արվել է Ազգային անվտանգության կոմիտեի նիստից հետո։

Պակիստանի կառավարության ձեռնարկած միջոցառումների թվում է Հնդկաստանի հետ երկկողմ համաձայնագրերի գործողության ժամանակավոր կասեցումը, այդ թվում՝ Սիմլայի համաձայնագրի, որը կնքվել է 1972 թ. հուլիսի 2-ին, և որով վերջ է դրվել Հնդկաստանի և Պակիստանի միջև պատերազմին։

Հնդկաստանի Պահալգամ քաղաքում առնվազն 26 մարդու կյանք խլած ահաբեկչական հարձակումից հետո երկրի իշխանությունները հայտնել են Իսլամաբադում ռազմական կցորդներին հետ կանչելու, դիվանագիտական անձնակազմի թիվը կրճատելու, 60 տարի առաջ ստորագրված գետի համատեղ օգտագործման մասին պայմանագրի գործողությունը կասեցնելու, ինչպես նաև Պակիստանի հետ ցամաքային անցակետը փակելու մասին։