ԵՄ խորհուրդը երկարաձգել է Մյանմայի դեմ պատժամիջոցները

ԵՄ խորհուրդը հայտարարել է Մյանմայից ֆիզիկական և իրավաբանական անձանց նկատմամբ սահմանափակող միջոցների մեկ տարով երկարաձգման մասին՝ մինչև 2026 թվականի ապրիլի 30-ը՝ «երկրում տիրող իրավիճակի հետ կապված»։

«Որոշումն ընդունվել է սահմանափակող միջոցների տարեկան վերանայման հիման վրա և հաշվի առնելով Մյանմայում շարունակվող ծանր իրավիճակը, ներառյալ ժողովրդավարությունը խաթարող գործողությունները և մարդու իրավունքների լուրջ խախտումները», - ասվում է ԵՄ խորհրդի հայտարարության մեջ։

Նշվում է, որ ԵՄ պատժամիջոցները ներկայումս կիրառվում են 106 ֆիզիկական անձանց և 22 կազմակերպությունների նկատմամբ: ԵՄ-ում նրանց ակտիվները ենթակա են սառեցման, և նրանց ուղղակի կամ անուղղակի միջոցների կամ տնտեսական ռեսուրսների տրամադրումն արգելված է։ Բացի այդ, ցուցակում ընդգրկված անձանց նկատմամբ ԵՄ մուտքի արգելք է սահմանվում։