Թրամփը սահմանում է տարեկան 100 հազար դոլար վճար ԱՄՆ-ի աշխատանքային վիզաների համար

ԱՄՆ նախագահ Դոնալդ Տրամփի վարչակազմը հաստատել է նոր կանոն, ըստ որի՝ ընկերությունները պարտավոր են լինելու տարեկան 100 հազար դոլար վճարել H-1B աշխատանքային վիզաների համար։ Այս վիզաները տրամադրվում են բարձրակարգ մասնագետներին՝ ՏՏ, ինժեներիայի, առողջապահության, ֆինանսների և այլ ոլորտներում։ Reuters-ի տվյալներով՝ նախաձեռնության նպատակն է սահմանափակել վիզաների օգտագործումը և պաշտպանել ամերիկյան աշխատաշուկան։

Նախագահի ստորագրած հրահանգը ուժի մեջ կմտնի 2025 թվականի սեպտեմբերի 21-ին։ Այն տարածվելու է թե՛ նոր հայտերի, թե՛ մինչ այդ ներկայացված, բայց չքննարկված դիմումների վրա։ Ընկերությունները, որոնք չեն վճարի սահմանված տուրքը, չեն կարողանա աշխատանքային վիզաներ ձևակերպել նոր աշխատակիցների համար։

H-1B վիզաների նկատմամբ պահանջարկը սովորաբար գերազանցում է տարեկան սահմանված 85 հազարի շեմը։ Ծրագիրը մեծապես օգտագործվում է տեխնոլոգիական ոլորտում՝ հատկապես Չինաստանից ու Հնդկաստանից եկած մասնագետների կողմից։ Ամերիկյան հսկա ընկերությունները, այդ թվում Microsoft-ը, JPMorgan-ը և Amazon-ը, արդեն աշխատակիցներին խորհուրդ են տվել ժամանակավորապես խուսափել միջազգային ճանապարհորդություններից՝ իրավիճակի հստակեցումից առաջ։