ՆԱՏՕ-ն սպառնում է կոշտ պատասխանով․ դաշինքը մեղադրում է Ռուսաստանին Էստոնիայի օդային տարածքը խախտելու մեջ

ՆԱՏՕ-ն հանդես է եկել հայտարարությամբ՝ Ռուսաստանին մեղադրելով Էստոնիայի օդային տարածքի խախտման մեջ։ Խոսքը երեք МиГ-31 կործանիչների մասին է, որոնք ըստ դաշինքի, ներխուժել են ՆԱՏՕ անդամ երկրի օդային սահման։ «Ռուսաստանի անպատասխանատու գործողություններին մեր արձագանքը լինելու է վճռական։ Ռուսաստանը չպետք է կասկածի․ ՆԱՏՕ-ն և իր դաշնակիցները կիրառելու են բոլոր անհրաժեշտ ռազմական և ոչ ռազմական միջոցները՝ ինքնապաշտպանության ու սպառնալիքների զսպման համար», – ասված է հայտարարության մեջ։

Ալյանսը նաև ընդգծել է, որ չի հրաժարվելու իր պարտավորություններից՝ Ուկրաինային աջակցելու հարցում։

Ի պատասխան՝ Ռուսաստանի պաշտպանության նախարարությունը հայտարարել է, որ սեպտեմբերի 19-ին երեք МиГ-31 ինքնաթիռներ իրականացնում էին պլանային թռիչք Կարելիայից դեպի Կալինինգրադի մարզի օդանավակայան։ ՌԴ ՊՆ-ի պնդմամբ՝ թռիչքը անցել է ըստ ծրագրի, առանց սահմանների խախտման։