Սերժ Սարգսյանն արձագանքել է Ռոբերտ Քոչարյանի հայտարարությանը

Ժամանակ չեմ ունեցել դիտելու Ռոբերտ Քոչարյանի մամուլի ասուլիսը, չեմ կարող որևէ կարծիք հայտնել։ Այս մասին դատական նիստից առաջ ասաց ՀՀ 3–րդ նախագահ Սերժ Սարգսյանն՝ անդրադառնալով ՀՀ երկրորդ նախագահ Ռոբերտ Քոչարյանի այն հայտարարությանը, որ երկու ուժ՝ «Հայաստան» դաշինքը և Սամվել Կարապետյանի ստեղծվող կուսակցությունն են 2026 թ․–ին մտնելու խորհրդարան։

Հարցին՝ ՀՀԿ–ն կմասնակցի՞ 2026 թվականին կայանալիք ընտրություններին, եթե իմպիչմենտի գործընթացը չհաջողվի, նա պատասխանեց․ «Կտեսնենք։ Դեռ չեմ ուզում եզրակացություններ անել։ Ժամանակին կհայտարարենք՝ մասնակցելու կամ չմասնակցելու հետ կապված»։

Անդրադառնալով դիտարկմանը, որ Նիկոլ Փաշինյանը, Ալմա Աթայի հռչակագրին հղում անելով, հայտարարում է, որ արդեն 1991 թվականից Ղարաբաղի հարցը լուծված էր, ձեր բանակցային գործընթացում առհասարակ Ալմա Աթայի հռչակագիրը ի՞նչ դերակատարություն է ունեցել, Սերժ Սարգսյանն ասաց. «Զրոյական դերակատարություն։ Նույնիսկ ադրբեջանցիները չէին համարձակվում այդպիսի արգումենտ բերել։ Բբա որ այն ժամանակից ամեն ինչը որոշված էր, բա ինչի՞ է Մինսկի խումբ ստեղծվել, ինչո՞ւ երեք համանախագահները հինգ անգամ հայտարարել են թե ինչպես գործընթաց կլինի։ Բա որ լուծված էր, լավ մենք շահագրգիռ էինք բանակցությունների մասնակցելու, բա Ադրբեջանական կողմն ինչի՞ էր գալիս բանակցությունների»։