Դեսպանը երախտագիտություն է հայտնել ՖՄԿ գլխավոր քարտուղարին՝ ՀՀ-ի հանդեպ իր ուշադրության համար

Հոկտեմբերի 7-ին Փարիզում՝ Ֆրանկոֆոնիայի միջազգային կազմակերպության կենտրոնակայանում, Հայաստանի Հանրապետության վարչապետի անձնական ներկայացուցիչ, դեսպան Արման Խաչատրյանն իր հավատարմագրման նամակն է հանձնել Ֆրանկոֆոնիայի միջազգային կազմակերպության գլխավոր քարտուղար Լուիզ Մուշիկիվաբոյին։ Այս մասին տեղեկանում ենք ՀՀ ԱԳՆ կայքից։

Հավատարմագրման նամակի հանձնմանը հաջորդած առանձնազրույցի ընթացքում դեսպան Խաչատրյանը վերահաստատել է Հայաստանի հավա­տարմությունը Ֆրանկոֆոնիայի միջազգային կազմակերպությանն իր անդամակ­ցությամբ ստանձնած հանձնառությանը՝ նպաստելու խաղաղության, համերաշխության, մարդու իրավունքների և համամարդկային այլ արժեքնե­րի խրա­խուսմանն ուղղված միասնական ջանքերին։

Դեսպանը կարևորել է Հայաստանի և ՖՄԿ միջև հաստատված արդյունավետ համագործակցությունը՝ գոհունակությամբ արձանագրելով, որ այս տարիների ընթացքում այդ հարաբերու­թյուն­ները շարունակական զար­գացում են ապրում:

Երկուստեք անդրադարձ է կատարվել 2027թ. Հայաստանում կայանալիք Ֆրանկո­ֆոնիայի 10-րդ մարզամշակութային խաղերին՝ որպես Հայաստանի և ՖՄԿ միջև  հարաբերություններն ամփոփող կարևոր հանգրվանի։ Այս համատեքստում դեսպան Խաչատրյանը վերահաստատել է Հայաստանի վճռականությունը խաղերը միջազգային բարձր չափանիշներին համահունչ անցկացնելու առնչությամբ։

Գլխավոր քարտուղարի խնդրանքով Արման Խաչատրյանը հանգամանալից ներկա­յացրել է Հարավային Կովկասում խաղաղության հաստատման ուղղությամբ Հայաստանի կողմից գործադրվող շարունակական ջանքերը՝ անդրադառնալով, մասնավորապես, օգոստոսի 8-ին Վաշինգտոնում Հայաստանի և Ադրբեջանի միջև ձեռք բերված պայմանավորվածություններին։

Դեսպանը երախտագիտություն է հայտնել Ֆրանկոֆոնիայի միջազգային կազմակերպությանը և անձամբ ՖՄԿ գլխավոր քարտուղար Լուիզ Մուշիկիվաբոյին՝ Հայաստանի հանդեպ իր առանձնահատուկ ուշադրության և տարածաշրջանում խաղաղության հաստատմանն ուղղված ջանքերին ցուցաբերած կարևոր աջակցության համար։

Շնորհավորելով դեսպան Խաչատրյանին՝ Լուիզ Մուշիկիվաբոն մաղթել է նրան արդյունավետ գործունեություն՝ ի նպաստ Հայաստանի և Ֆրանկոֆոնիայի միջազգային կազմակերպության, ինչպես նաև վերջինիս շրջանակներում Հայաստանի և անդամ այլ երկրների միջև հաստատված բարեկամական և համագործակցային ամուր կապերի առավել զարգացման։