Գերմանացի պատմաբանը կանխատեսել է Ռուսաստանի և ՆԱՏՕ-ի միջև հնարավոր ռազմական բախում

Գերմանացի պատմաբան և Երկրորդ համաշխարհային պատերազմի մասնագետ Զենկե Նայտցելը հայտարարել է, որ առաջիկա երեք տարիներին կարող է տեղի ունենալ ռազմական բախում Ռուսաստանի և ՆԱՏՕ-ի ուժերի միջև։ Նրա խոսքերով՝ չի բացառվում, որ պատերազմական գործողությունները սկսվեն Լիտվայում․ «Հնարավոր է, որ մեր զորքերը ստիպված լինեն կռվել այնտեղ՝ հաջորդ տարի, կամ երեք տարի անց՝ ով գիտե։ Բայց վտանգն իրական է», — նշել է Նայտցելը Bild-ի հետ զրույցում։

Նա ընդգծել է, որ Գերմանիայի համար խաղաղ ժամանակաշրջանը ավարտվել է, թեև երկիրը դեռ պատերազմի մեջ չէ․ ըստ նրա՝ Բեռլինը գտնվում է «միայն խաղաղության և պատերազմի միջև միջանկյալ վիճակում»։

Պատմաբանը կոչ է արել Գերմանիայի իշխանություններին մեծացնել ներդրումները պաշտպանական համակարգերում, հատկապես՝ անօդաչուներից պաշտպանության ոլորտում։ Նախօրեին Ֆինլանդիայի Միկկելի քաղաքում, Ռուսաստանի սահմանին մոտ, բացվել է ՆԱՏՕ-ի ցամաքային ուժերի նոր շտաբը, որտեղ ծառայելու են դաշինքի և ֆիննական բանակի զինծառայողներ։