Եվրոպարլամենտը մերժեց անվստահության քվեարկությունը ֆոն դեր Լայենին

Եվրոպական խորհրդարանը մերժել է երկու նախագծեր, որոնք առաջարկում էին անվստահություն հայտնել Եվրոպական հանձնաժողովի նախագահ Ուրսուլա ֆոն դեր Լայենին։ Քվեարկության ուղիղ հեռարձակումը կատարվել է խորհրդարանի կայքում։

«Եվրոպայի հայրենասերներ» խմբակցության նախաձեռնած առաջին քվեարկությանը կողմ է քվեարկել 179 պատգամավոր, իսկ «Ձախեր» խմբակցության երկրորդ առաջարկին՝ 133-ը։ Դեմ են քվեարկել համապատասխանաբար 378 և 383 պատգամավոր։

Ավելի վաղ ֆոն դեր Լայենը դիմել էր եվրոպական օրենսդիրներին՝ կոչ անելով չաջակցել իր պաշտոնանկությանը։ Նա շեշտել էր, որ Եվրոպան գտնվում է «անորոշության և պայթյունավտանգ անկայունության շրջանում» և հորդորել պատգամավորներին՝ ցույց տալ համախմբման օրինակ։ Ֆոն դեր Լայենը նաև մեղադրել էր իր դեմ քվեարկող պատգամավորներին՝ Ռուսաստանի շահերը սպասարկելու մեջ։