Թրամփը սկսել է լայնածավալ արշավ՝ լիբերալ կազմակերպությունների դեմ

ԱՄՆ նախագահ Դոնալդ Թրամփը նախաձեռնել է լայնամասշտաբ գործողություն՝ ուղղված լիբերալ կազմակերպությունների և նրա քաղաքական օրակարգին դեմ հանդես եկող դոնորների նկատմամբ։ Reuters-ի տեղեկություններով՝ արշավը համակարգում է Թրամփի գլխավոր խորհրդական Սթիվեն Միլլերը, իսկ գործընթացում ներգրավված են միաժամանակ մի քանի դաշնային կառույցներ՝ FBI-ն, Արդարադատության նախարարությունը, Ներքին անվտանգության գերատեսչությունը, ինչպես նաև Գանձապետարանը և Ներքին եկամուտների ծառայությունը։ Վարչակազմը հայտարարում է, թե այս կազմակերպությունները ֆինանսավորում են «քաղաքական բռնություն» և «հակաամերիկյան գործունեություն»։

Թրամփի ցուցումով իրավապահները սկսել են ուսումնասիրել մի շարք հիմնադրամների և կառույցների ֆինանսական աղբյուրները, այդ թվում՝ Ջորջ Սորոսի Open Society Foundations-ը, դեմոկրատների ֆինանսավորման հարթակ ActBlue-ն, ինչպես նաև միգրանտների և մարդու իրավունքների կազմակերպությունները։ Քննարկվում է նրանց հարկային արտոնություններից զրկելու, ֆինանսական հոսքերը վերահսկելու և որոշ դեպքերում քրեական հետաքննություններ սկսելու տարբերակ։

Քաղաքացիական իրավունքների պաշտպաններն ահազանգում են, որ նախաձեռնությունը վտանգավոր նախադեպ է՝ ուղղված քաղաքական ընդդիմախոսների լռեցմանը։ Պատմաբան Թիմոթի Նավթալին համեմատել է այս իրավիճակը Նիքսոնի վարչակարգի հետ՝ նշելով, որ Թրամփը գնում է ավելի հեռու, քանի որ ունի ենթակա Կոնգրես և լիովին հավատարիմ նախարարներ, ինչը «ավելի վտանգավոր է ԱՄՆ-ի իրավական համակարգի համար, քան 1970-ականները»։