Բելգիայի պաշտպանության նախարարը զգուշացրել է․ «Ռուսաստանը արտադրում է ՆԱՏՕ-ի բոլոր երկրների համեմատ չորս անգամ ավելի զինամթերք»

Բելգիայի պաշտպանության նախարար Թեո Ֆրանկենը հայտարարել է, որ Ռուսաստանը արտադրում է զինամթերք ՆԱՏՕ-ի բոլոր անդամ երկրների ընդհանուր ծավալից չորս անգամ ավելի։ Այս մասին նա ասել է De Morgen պարբերականին տված հարցազրույցում՝ արձագանքելով Արևմուտքում հնչող կարծիքներին, թե «Ռուսաստանից վախենալ պետք չէ»։

Նախարարը ընդգծել է, որ Եվրոպան չունի կենտրոնացված ռազմական հրամանատարություն․ «Բացառությամբ Ստրասբուրգում տեղակայված մի քանի ստորաբաժանումների, մենք չունենք ոչինչ, ինչը կարելի է անմիջապես նետել մարտի դաշտ», — նշել է նա։

Ֆրանկենը Ռուսաստանը բնորոշել է որպես «գեոպոլիտիկ գերտերություն՝ հզոր բանակով և մեծ մարտական ոգով»։ Ավելի վաղ ֆինլանդացի քաղաքական գործիչ Արմանդո Մեման էլ զգուշացրել էր, որ Եվրամիության առաջնորդները պետք է հիշեն՝ Եվրոպան պաշտպանություն չունի ռուսական նորագույն հրթիռներից։