Հայաստանիը 134 մլն եվրո վարկ է վերցնում Գերմանիայից․ ինչ է անելու կառավարություն այս գումարով (տեսանյութ)

Գերմանիայի կառավարությունը 152 միլիոն եվրոյի աջակցություն կհատկացնի Հայաստանին։ Այդ մասին հայտնել է էկոնոմիկայի նախարար Գևորգ Պապոյանը:

«Ահա այն հիմնական արդյունքը, որին հասանք Բեռլինում Հայաստան-Գերմանիա միջկառավարական հանձնաժողովի համատեղ նիստի ընթացքում, որը հայկական կողմից ղեկավարում եմ ես: Այդ 152 մլն եվրոյից 18 մլն եվրոն անհատույց գրանտային միջոցներ են, իսկ 134 մլն-ը՝ շատ ցածր՝ 0-ից մի փոքր բարձր տոկոսադրույքով վարկային միջոցներ: Այդ ամբողջ գումարը ուղղելու ենք Հայաստանում ՓՄՁ-ների զարգացմանը, վերականգնվող էներգետիկայի և ջրային համակարգերի զարգացմանն ու Հայաստանի տնտեսության բազմաթիվ կարևոր խնդիրների լուծմանը»,- նշել է Պապոյանը:  

Հիշեցնենք՝ ՀՀ էկոնոմիկայի նախարար Գևորգ Պապոյանի համանախագահությամբ հոկտեմբերի 30-ին Գերմանիայի Դաշնային Հանրապետության մայրաքաղաք Բեռլինում կայացել է Հայաստանի Հանրապետության և Գերմանիայի Դաշնային Հանրապետության միջև ֆինանսական և տեխնիկական համագործակցության միջկառավարական հանձնաժողովի նիստը։

Հանձնաժողովի հայկական կողմի համանախագահն էր ՀՀ էկոնոմիկայի նախարար Գևորգ Պապոյանը, իսկ գերմանական կողմից՝ ԳԴՀ Տնտեսական զարգացման և համագործակցության նախարարության պետքարտուղար Նիլս Աննենը։