Դիետոլոգը նախազգուշացնում է․ ձմռանը ուշ ժամին ընթրիքը կարող է բերել գրգռվածության և անքնության

Դիետոլոգ Վալենտինա Պալացոն La Razon–ի հետ զրույցում նշել է, որ ձմռան ամիսներին անհրաժեշտ է փոխել սննդային սովորությունները՝ հատկապես ընթրիքի ժամի հարցում։ Նրա խոսքով՝ տարվա այս շրջանում վերջին կերակուրը պետք է ընդունել ոչ ուշ, քան 19:00-ին, քանի որ մելատոնինի՝ քնի հորմոնի արտադրությունն ակտիվանում է ավելի շուտ՝ արևի լույսի պակասի պատճառով։

Մասնագետը ընդգծել է, որ ուշ ընթրիքը ստիպում է օրգանիզմին սկսել մարսողական գործընթացը հենց այն պահին, երբ ներքին համակարգերը պատրաստվում են հանգստին։ Դա կարող է բերել անհանգիստ քնի, ծանրության զգացման, գրգռվածության և հաջորդ օրը ուժասպառության։ Պալացոն նաև խորհուրդ է տվել երեկոյան խուսափել քաղցրից և ալկոհոլից։

Ընթրիքը, ըստ դիետոլոգի, պետք է կազմված լինի նիհար սպիտակուցներից, եփած բանջարեղենից և փոքր չափաբաժնի բարդ ածխաջրերից։ Ավելի վաղ դիետոլոգ Մարինա Մակիշան հորդորել էր չդիմել խիստ դիետաների մինչև Ամանորը, որպեսզի բացառվեն  չափից շատ ուտելու ռիսկերը տոնական օրերին։