Air India-ում տեխնիկական խափանումները հասել են 14 ամսվա առավելագույնին

Հնդկաստանի երկրորդ խոշոր ավիափոխադրողը՝ Air India, հունվարին արձանագրել է տեխնիկական միջադեպերի ամենաբարձր մակարդակը առնվազն վերջին 14 ամսում։ Reuters-ի ուսումնասիրած ընկերության ներքին փաստաթղթի համաձայն՝ շարժիչի յուղի և վառելիքի արտահոսքերի, ինչպես նաև այլ տեխնիկական խնդիրների հաճախականությունը հասել է 1.09 դեպքի՝ յուրաքանչյուր 1000 չվերթի հաշվով, մինչդեռ 2024 թվականի դեկտեմբերին այդ ցուցանիշը կազմում էր 0.26։ Հունվարին իրականացված ավելի քան 17,500 չվերթներից գրանցվել է 23 տեխնիկական միջադեպ, որոնցից առնվազն 21-ը ենթարկվել են պաշտոնական քննության։

Ավիաընկերությունը գտնվում է կարգավորիչների ուշադրության կենտրոնում անցած տարվա ավիավթարից հետո, որի հետևանքով զոհվել էր 260 մարդ։ Հնդկաստանի քաղաքացիական ավիացիայի նախարարության տվյալներով՝ 2025 թվականի հունվարից ուսումնասիրված 166 օդանավերից 82.5 տոկոսի մոտ արձանագրվել են կրկնվող տեխնիկական խնդիրներ։ Խափանումները գրանցվել են թե՛ Airbus, թե՛ Boeing տիպի օդանավերում, ներառյալ վառելիքի և յուղի արտահոսքի դեպքեր, շարժիչի աշխատանքի խափանումների ազդանշաններ և հիդրավլիկ համակարգերի խնդիրներ։

Ընկերությունը հայտարարել է, որ սկսել է համապարփակ ծրագիր՝ տեխնիկական հուսալիությունը բարձրացնելու նպատակով՝ ավելացնելով պահեստային կարևոր բաղադրիչների պաշարները ավելի քան 30 տոկոսով և ներդրումներ կատարելով ինժեներական ենթակառուցվածքներում։ Air India-ն, որը պատկանում է Tata Group-ին և Singapore Airlinesին, այժմ իրականացնում է պարբերական ստուգումներ Airbus A320 և Boeing 777 օդանավերի համար՝ փորձելով նվազեցնել միջադեպերի մակարդակը և վերականգնել իր հեղինակությունը միջազգային շուկայում։