Նոր մանրամասներ․ Վանաձորում կաշառքի գործով 3-րդ անգամ ձերբակալվել է ավագանու անդամ Արմեն Այվազյանը

Այսօր Վանաձորում ձերբակալված պաշտոնյաներից մեկը՝ Արմեն Այվազյանը, արդեն 3-րդ անգամն է ձերբակալվում նույն կաշառքի գործով։ Նախկին ընդդիմադիր ավագանու անդամն երրորդ անգամ իրավապահների կողմից բերման ենթարկվեց որպես ՔՊ ավագանու ներկայացուցիչ։ Նա զբաղեցնում էր համայնքապետարանի եկամուտների հավաքագրման, գույքի կառավարման և գովազդի բաժնի նախկին պետի պաշտոնը։ Արմեն Այվազյանը մեղադրվում է կաշառք ստանալու և տալու, խմբով պաշտոնեական լիազորությունները չարաշահելու, ինչպես նաև խարդախության մեջ։

Հատկանշական է, որ ներկայումս ավագանու անդամ է՝ նշանակված «Քաղաքացիական պայմանագիր» կուսակցության կողմից, և սրան նախորդած արարները կապվում էին հենց ենթադրյալ կաշառքի գործով ներման ու քաղաքական թիմը փոխելու հանգամանքով։ Նախկինում նա եղել է «Ապրելու երկիր» կուսակցության անդամ, իսկ շատ ավելի վաղ սույն անձի մասին արխիվային նյութերում հիշատակվում է վերջինիս՝ Ծառուկյանի գլխավորած ԲՀԿ անդամության մասին։

Վերջին ձերբակալությունը տեղի էր ունեցել մոտ չորս ամիս առաջ՝ 2023 թվականին հարուցված գործի շրջանակում, և հասկանալի չէ, թե ինչու և ինչ հանգամանքներում է նա պարբերաբար ազատ արձակվում հակակոռուպցիոն կոմիտեում քննվող գործի շրջանակներում՝ ձերբակալություններից հետո։

Ըստ բնակիչների՝ երբեմնի ընդդիմադիր ավագանու այս անդամը նախկինում ձերբակալություններից հետո բացահայտ կողմ էր քվեարկում ՔՊ-ի ներկայացրած նախագծերին, սակայն այս անգամ, արդեն ՔՊ-ի կազմում ներկայանալով, դեմ է քվեարկել նախագծերից մեկին, որով, ըստ ամենայնի, հողակտորի ճակատագիր պիտի որոշվեր, և ահա նորից հայտնվել է իրավապահների ուշադրության կենտրոնում։

Նշենք, որ այսօր Վանաձորի համայնքային ծառայողներից 7 անձ է ձերբակալվել ենթադրյալ կաշառքի գործով, ինչպես նաև 3 քաղաքացի, որոնց անունները իրավապահները հրաժարվում են հրապարակել։