Վազգեն Թևանյանը կիսաեզրափակիչում է. ազատոճայինների արդյունքները ԵԱ-ի մեկնարկային օրը

Ալբանիայի մայրաքաղաք Տիրանայում մեկնարկած ազատ ոճի ըմբշամարտի Եվրոպայի առաջնությունում Հայաստանի հավաքականի 65 կգ քաշային Վազգեն Թևանյանը երկու անընդմեջ հաղթանակ է տարել և դուրս եկել մրցաշարի կիսաեզրափակիչ: Այսօր երեկոյան հայ ըմբիշը կգոտեմարտի եզրափակիչի ուղեգրի համար: Այս մասին տեղեկանում ենք armsport.am կայքից։

Մեկնարկային գոտեմարտում Թևանյանը 5-2 հաշվով առավելության է հասել Ֆրանսիայի ներկայացուցիչ Խամզատ Արսամերզուևի նկատմամբ: Այնուհետև, քառորդ եզրափակիչի չափազանց լարված պայքարում նա 2-1 հաշվով պարտության է մատնել բուլղարացի Շամիլ Մամադովին՝ ապահովելով կիսաեզրափակիչի ուղեգիրը:

Հայաստանի հավաքականի մյուս անդամներից քառորդ եզրափակիչի ուղեգիր է նվաճել 57 կգ քաշային Մանվել Խնձրցյանը, որը 12-6 հաշվով հաղթել է գերմանացի Հորսթ Լեռին: Հրայր Ալիխանյանը (79 կգ) և Դավիթ Մարգարյանը (70 կգ) զիջել են իրենց մեկնարկային գոտեմարտերում, սակայն կպահպանեն պայքարը շարունակելու հնարավորություն, եթե նրանց հաղթած մրցակիցները հասնեն եզրափակիչ: Հավելենք, որ կիսաեզրափակիչի գոտեմարտերը կմեկնարկեն ժամը 18:45-ին և կցուցադրվեն «Առաջին ալիքի» ուղիղ եթերում: