Առաջին անգամ է, որ ԵՔՀ-ն հանդիպում է այստեղ՝ Հարավային Կովկասում՝ Հայաստանը դնելով Եվրոպայի սրտում. ԵԽ նախագահ

Այսօր Եվրոպական քաղաքական համայնքի գագաթնաժողովն իսկապես պատմական է: Պատմական է, որովհետև առաջին անգամ է, որ ԵՔՀ-ն հանդիպում է այստեղ՝ Հարավային Կովկասում՝ Հայաստանը դնելով Եվրոպայի սրտում, հենց այնտեղ, որտեղ Հայաստանը պատկանում է՝ հաշվի առնելով վերջինիս հինավուրց պատմությունը: Այդ մասին ԵՔՀ 8-րդ գագաթնաժողովի շրջանակում՝ իր ելույթի ժամանակ, ասաց Եվրոպական խորհրդի նախագահ Անտոնիու Կոշտան:

«Սա պատմական է, քանի որ այսօրվա գագաթնաժողովը հնարավոր է դարձել Հայաստանի և Ադրբեջանի միջև կնքված համաձայնության շնորհիվ, համաձայնություն, որը խաղաղության պատմություն է Եվրոպայի համար Եվրոպայում, որը պետք է տոնվի մի աշխարհում, որտեղ պատերազմները կարծես գերակայում են:

Այս համաձայնագրի շնորհիվ է, որ բարելավվել են հարաբերությունները Հայաստանի և Թուրքիայի միջև, և սրա շնորհիվ է, որ այս տարածաշրջանն անցել է փոխակերպման ճանապարհը»,- ասաց նա:

Եվրոպական խորհրդի նախագահն այս համատեքստում հայտարարեց, որ ԵՄ-ն պատրաստ է վստահելի գործընկեր դառնալ՝ ապահովելով պահի, խաղաղության, հնարավորությունների, բարգավաճման անդառնալիությունը:

«Կենսական նշանակություն ունի ամրապնդել Հայաստանի ժողովրդավարությունը, պայքարել արտաքին ազդեցությունների և ապատեղեկատվության դեմ: Հայաստանի ժողովրդավարության ապագան միայն Հայաստանի քաղաքացիների ձեռքում է»,- ասաց նա:

Անտոնիու Կոշտան նշեց ևս մեկ պատճառ, թե ինչու է այս գագաթնաժողովը պատմական: Ըստ նրա՝ առաջին անգամ է, որ ԵՔՀ գագաթնաժողովին հրավիրվել է ոչ եվրոպացի գործընկեր, այն է՝ Կանադայի վարչապետը: