Ուրախ ենք, որ կառուցողական քայլերը կոնկրետ առաջընթաց են ապահովում. Թուրքիայի փոխնախագահ

Թուրքիայի փոխնախագահ Ջևդեթ Յըլմազն իր X-ի էջում մանրամասներ է հայտնել Երևանում ընթացող Եվրոպական քաղաքական համայնքի 8-րդ գագաթնաժողովի շրջանակում ՀՀ վարչապետ Նիկոլ Փաշինյանի հետ ունեցած հանդիպման վերաբերյալ։

Նա նշել է, որ Ռեջեփ Թայիփ Էրդողանի անունից անցկացված բանակցությունները եղել են համապարփակ ու արդյունավետ, որոնց ընթացքում քննարկվել են երկկողմ հարաբերությունները, ինչպես նաև տրանսպորտի, մաքսային ոլորտի, էներգետիկայի և թվային ենթակառուցվածքների հզորացմանն ուղղված քայլերը։

Յըլմազը հատուկ ընդգծել է Անիի կամրջի համատեղ վերականգնման վերաբերյալ ստորագրված փոխըմբռնման հուշագիրը՝ այն համարելով խորհրդանշական և կարևոր քայլ, որը կնպաստի տարածաշրջանում մշտական խաղաղությանն ու կայունությանը։ 

«Ուրախ ենք, որ կարգավորման գործընթացում ձեռնարկված փոխադարձ կառուցողական քայլերը կոնկրետ առաջընթաց են ապահովում»,- գրել է նա X-ի իր էջում։