Իրանի շուրջ ճգնաժամը հարվածել է նավթի աշխարհի խոշորագույն գնորդներից մեկին

Մերձավոր Արևելքում լարվածության աճը և Հորմուզի նեղուցով մատակարարումների խափանումները շարունակում են ազդեցություն ունենալ Չինաստանի էներգետիկ շուկայի վրա։ Reuters-ի փոխանցմամբ՝ հուլիսին Սաուդյան Արաբիայից Չինաստան նավթի մատակարարումները կարող են մնալ պատմականորեն ցածր մակարդակում։

Աղբյուրների գնահատմամբ՝ հուլիսին օրական մատակարարումների ծավալը կկազմի շուրջ 12 միլիոն բարել։ Նման իրավիճակին նպաստում է հումքի պահանջարկի նվազումը՝ պայմանավորված նավթի գների արագ աճով։ Նշվում է, որ աշխարհի խոշորագույն նավթավերամշակող ընկերություններից Sinopec-ը արդեն երկրորդ ամիս անընդմեջ չի գնում սաուդյան նավթ, իսկ Rongsheng Petrochemical-ը շարունակում է ներկրումները, սակայն զգալիորեն կրճատված ծավալներով։

Փորձագետների կարծիքով՝ իրավիճակի վրա ազդել է նաև Saudi Aramco-ի կողմից արտահանվող նավթի գների բարձրացումը։ Չինաստանը, ինչպես նաև Հնդկաստանը, շարունակում են մնալ Մերձավոր Արևելքից էներգակիրների մատակարարումներից առավել կախված տնտեսություններից։ 2026 թվականի առաջին հինգ ամիսների արդյունքներով Չինաստանի նավթի ներմուծման ծավալը տարեկան կտրվածքով նվազել է գրեթե 5 տոկոսով, մինչդեռ արժեքային արտահայտությամբ աճել է և գերազանցել 128 միլիարդ դոլարը։