«Դա ԵՄ-ի գինն է». ռուս փորձագետը՝ Հայաստանի արտահանման սահմանափակումների մասին

Ռուսաստանի կողմից հայկական գյուղատնտեսական արտադրանքի արտահանման նկատմամբ կիրառվող սահմանափակումները Երևանի՝ դեպի Եվրամիություն ուղղված քաղաքականության հետևանքն են։ Այս մասին Երևանում անցկացված «Հարավային Կովկասի էներգետիկ անվտանգությունը» թեմայով համաժողովի շրջանակում լրագրողների հետ զրույցում հայտարարել է արևելագետ, տարածաշրջանային քաղաքականության փորձագետ, Ռուսաստանի գիտությունների ակադեմիայի հասարակական գիտությունների գիտական տեղեկատվության ինստիտուտի Մերձավոր և հետխորհրդային Արևելքի բաժնի վարիչ Վլադիմիր Ավատկովը։

Նրա խոսքով՝ խնդիրը ոչ թե գաղափարախոսական, այլ տնտեսական բնույթ ունի։

«Կան ինտեգրացիոն հարթակներ, և հնարավոր չէ միաժամանակ լինել մի քանի նման հարթակներում, հատկապես, երբ դրանց օրենսդրական համակարգերը միմյանց չեն համապատասխանում»,- նշել է փորձագետը։

Ավատկովի գնահատմամբ՝ Հայաստանի եվրոպական ուղղությամբ շարժումը չի կարող ֆինանսավորվել Ռուսաստանի կողմից, և հենց այդ համատեքստում պետք է դիտարկել հայկական արտադրանքի նկատմամբ սահմանափակումները։

«Այս սահմանափակումներն իսկապես ցավոտ են թե՛ Հայաստանի, թե՛ Ռուսաստանի համար։ Պարզ օրինակ՝ հայկական ծիրանի գինը բարձրացել է։ Սա խնդիր է նաև մեզ համար, քանի որ ռուս սպառողները սիրում են հայկական ծիրանը։ Սակայն, ըստ էության, սա այն գինն է, որը վճարվում է դեպի Եվրամիություն շարժվելու համար»,- ասել է նա։

Փորձագետի կարծիքով՝ ներկայում խնդիրն առնչվում է գյուղատնտեսական արտադրանքին, սակայն առկա զարգացումների պայմաններում հնարավոր է քննարկման առարկա դառնա նաև գազային համաձայնագրերի վերանայումը։