Թրամփը ցուցադրել է իր կերպարը ոսկուց ձուլված՝ ԱՄՆ 4 նախագահների ընկերակցությամբ

ԱՄՆ նախագահ Դոնալդ Թրամփը Truth Social սոցիալական ցանցում հրապարակել է տեսանյութ, որտեղ նա ներկայացված է ոսկեզօծ քանդակի տեսքով՝ ԱՄՆ չորս նախկին նախագահների կողքին։

Տեսանյութում նրա ոսկեզօծ կիսանդրին ավելացված է Ռաշմոր լեռան հայտնի կոմպոզիցիային, որտեղ պատկերված են Ջորջ Վաշինգտոնը, Թոմաս Ջեֆերսոնը, Թեոդոր Ռուզվելտը և Աբրահամ Լինքոլնը։

Խոսքը «Ժողովրդավարության սրբավայր» (Shrine of Democracy) անվամբ հայտնի հուշարձանի մասին է, որը գտնվում է Հարավային Դակոտայի Բլեք Հիլս լեռներում։ 18,6 մետր բարձրությամբ այս հուշարձանը կառուցվել է 1927–1941 թվականներին և 1939 թվականից ունի ԱՄՆ ազգային հուշահամալիրի կարգավիճակ։

Տեսանյութում հնչում է Թրամփի ձայնին նմանվող խոսք, որտեղ ասվում է․ «Ես դեռ երկար տարիներ կհամարվեմ ամենամեծ նախագահը»։

Հրապարակման մեջ նշվում է նաև բրիտանացի նկարիչ և քանդակագործ Իեն Ալեքսանդրը, որը նախկինում ներկայացրել էր 250 դոլար անվանական արժեքով թղթադրամի կոնցեպտ՝ Թրամփի պատկերով։