Ynet․ Հայոց ցեղասպանության ճանաչումը խոր ճեղք է բացել Իսրայել–Ադրբեջան հարաբերություններում

Իսրայելի կողմից Հայոց ցեղասպանության ճանաչման որոշումը լուրջ դժգոհություն է առաջացրել Ադրբեջանում և կարող է բացասաբար անդրադառնալ երկու երկրների հարաբերությունների վրա։ Այս մասին հայտնում է Ynet-ը։

Պարբերականի տեղեկություններով՝ Բաքվում այդ քայլը դիտարկում են որպես «կարմիր գծի» հատում՝ պնդելով, որ Իսրայելը բավարար չափով հաշվի չի առել Ադրբեջանի երկարամյա աջակցությունն ու դիրքորոշումը տարածաշրջանային հարցերում։

Աղբյուրների համաձայն՝ ադրբեջանական իշխանությունների դժգոհությունը պայմանավորված է ոչ միայն որոշման բովանդակությամբ, այլև դրա ընդունման ընթացակարգով։ Նշվում է, որ Իսրայելի արտգործնախարար Գիդեոն Սաարը ադրբեջանցի գործընկերոջ հետ կապ է հաստատել միայն այն բանից հետո, երբ որոշումն արդեն հրապարակվել էր, ինչը Բաքվում ընկալվել է որպես փաստի առաջ կանգնեցնելու փորձ։

Ynet-ի փոխանցմամբ՝ ադրբեջանական կողմը մտահոգված է նաև այն հանգամանքով, որ միջազգային որոշ շրջանակներ միաժամանակ մեղադրանքներ են հնչեցնում թե՛ Իսրայելի հասցեին՝ Գազայի իրադարձությունների, թե՛ Ադրբեջանի հասցեին՝ Լեռնային Ղարաբաղի հետ կապված գործընթացների վերաբերյալ։

Հրապարակման համաձայն՝ Բաքվում ակնկալում էին, որ Իսրայելը կխուսափի նման քայլից՝ հաշվի առնելով երկու երկրների ռազմավարական հարաբերությունները և Ադրբեջանի դիրքորոշումը Մերձավոր Արևելքում ընթացող մի շարք զարգացումների վերաբերյալ։

Պարբերականը նշում է, որ ադրբեջանական շրջանակներում այժմ քննարկվում է, թե ինչ ազդեցություն կարող է ունենալ այս որոշումը երկկողմ հարաբերությունների վրա։ Միաժամանակ Բաքվում հույս են հայտնում, որ ստեղծված լարվածությունը չի խորանա, և հարցը չի հասնի հետագա քաղաքական ու օրենսդրական գործընթացների։