CNN․ Հեգսեթը կայցելի Իսրայել՝ քննարկելու Անկարայի և F-35 կործանիչների հարցը

ԱՄՆ պաշտպանության նախարար Փիթ Հեգսեթը չորեքշաբթի կկատարի իր առաջին պաշտոնական այցը Իսրայել, որտեղ հանդիպում կունենա վարչապետ Բենիամին Նեթանյահուի հետ։ Այդ մասին հայտնում է CNN-ը՝ հղում անելով իրավիճակին ծանոթ երեք աղբյուրի։

Հեռուստաալիքի տեղեկություններով՝ այցի հիմնական նպատակներից մեկը Իսրայելի մտահոգությունները մեղմելն է՝ կապված Թուրքիային ամերիկյան F-35 կործանիչների հնարավոր վաճառքի հետ։ Այս հարցը ԱՄՆ նախագահ Դոնալդ Թրամփը քննարկել էր ՆԱՏՕ-ի վերջին գագաթնաժողովի ընթացքում։

Ներկայում Իսրայելը Մերձավոր Արևելքում միակ երկիրն է, որը շահագործում է F-35 կործանիչներ։ Ավելի վաղ Բենիամին Նեթանյահուն CNN-ին տված հարցազրույցում հայտարարել էր, որ Թուրքիայի նախագահ Ռեջեփ Թայիփ Էրդողանը «ԱՄՆ-ի համար օրինակելի դաշնակից չէ» և, նրա խոսքով, սպառնում է Իսրայելին։

Ամերիկացի պաշտոնյայի փոխանցմամբ՝ Հեգսեթը, որը Թրամփի պատվիրակության կազմում մասնակցել էր ՆԱՏՕ-ի գագաթնաժողովին, կլքի պատվիրակությունը և կմեկնի Իսրայել։ Միևնույն ժամանակ դեռևս պարզ չէ, թե ԱՄՆ-ի՝ Իրանի դեմ վերջին հարվածներն ինչ ազդեցություն կունենան այցի ծրագրի վրա։ Սպասվում է նաև Հեգսեթի հանդիպումը Իսրայելի պաշտպանության նախարար Իսրայել Կացի հետ։

Ավելի վաղ Նեթանյահուն քննադատել էր Թուրքիայի նախագահ Ռեջեփ Թայիփ Էրդողանի հայտարարությունները՝ նշելով, որ պատրաստվում է այդ հարցը բարձրացնել ԱՄՆ ղեկավարության հետ։ Իր հերթին Էրդողանը մայիսին Կուրբան Բայրամի առթիվ ունեցած ելույթում կոշտ քննադատության էր ենթարկել Իսրայելի վարչապետին։