Սպանության մեղադրանքներ են առաջադրվել խորտակված «Սևոլ» լաստանավի անձնակազմի չորս անդամների

Ոչ կանխամտածված սպանության մեղադրանքներ են առաջադրվել խորտակված «Սևոլ» լաստանավի անձնակազմի չորս անդամների՝ ներառյալ նավապետին: Այդ մասին մայիսի 15-ին հաղորդել է Ռյոնհապ գործակալությունը:

Դատախազներն այդ որոշումն են ընդունել նավապետի, նրա երկու օգնականների, ինչպես նաև գլխավոր ինժեների նկատմամբ՝ խորտակվող լաստանավից հարյուրավոր ուղևորների տարհանումից հրաժարվելու համար:

Ինչհոն նավահանգստից Չեջուդո կղզի մեկնող «Սևոլ» լաստանավը՝ 6 հազար 825 տոննա ջրատարողությամբ, ջրասույզ է եղել ապրիլի 16-ին Կորեական թերակղզու հարավարևմտյան վերջավորության մոտ: Նավում եղել են 476 ուղևոր և անձնակազմի անդամ, ընդ որում նրանց մեծ մասը Անսան քաղաքի դպրոցներից մեկի բարձրդասարանցիներ էին: Երբ նավն սկսել է խորտակվել, կարողացել է փրկվել սոսկ 172 մարդ: Ողբերգության զոհերի ընդհանուր թիվը հասել է 281-ի: Եվս 23 ուղևոր համարվում է անհայտ կորած:

Նախօրյակին հաղորդվել է, որ լաստանավի անձնակազմի երեք անդամ հետմահու արժանացել են Կորեայի Հանրապետության հերոսի կոչման: Այդ բարձր պարգևը նրանք վաստակել են նրանով, որ քաջություն են ցուցաբերել և զոհաբերել իրենց` խորտակվող նավի ուղևորներին փրկելու համար:

Հերոսներ են դարձել 22-ամյա Պակ Չի Յոնը, 28-ամյա Չոն Հյոն Սոնը և նրա 28-ամյա փեսացուն՝ Կիմ Գի Ունը, որը ժամանակավոր աշխատանքի էր տեղավորվել լաստանավում, որպեսզի հարսնացուի կողքին լիներ:

«Այդ մարդիկ հերոսական արարք են կատարել՝ նավի վրա մնալով մինչև վերջին հնարավորությունը, որպեսզի փրկեն ուղևորներին»,- նշել է Հարավային Կորեայի կառավարության ներկայացուցիչը, հաղորդել է ՌԻԱ Նովոստին: