«Հյուսիսատլանտյան դաշինքի դռները բաց են բոլորի համար». Ռասմուսեն

ՆԱՏՕ-ի գլխավոր քարտուղար Անդերս ֆոգ Ռասմուսենն այն կարծիքին է, որ Ռուսաստանը ոչինչ չի արել Ուկրաինայի վերաբերյալ ժնևյան պայմանավորվածությունները կատարելու համար: Այս կարծիքը նա հայտնել է Բրատիսլավայում՝ ելույթ ունենալով անվտանգության հարցերին նվիրված միջազգային խորհրդաժողովում:

«Ռուսաստանը ոչ մի քայլ չի արել ժնևյան համաձայնությունները կատարելու համար»,-հայտարարել է ՆԱՏՕ-ի գլխավոր քարտուղարը:

«ՆԱՏՕ-ի ավելի տեսանելի ներկայություն է անհրաժեշտ դաշինքի տարածքում»,-հավելել է Ռասմուսենը:

Նրա խոսքով՝ Եվրոպայում ՆԱՏՕ-ի ռազմական ներկայության ընդլայնումն արդեն տեղի է ունենում. Դաշինքի ուժերի վարժանքներն Ուկրաինայի ճգնաժամի կապակցությամբ ավելի հաճախակի կլինեն: «Վարժանքները կլինեն ավելի հաճախակի, ավելի պահանջված և ավելի նկատելի»,-ընդգծել է գլխավոր քարտուղարը:

Ռասմուսենը հավաստիացրել է նաև, որ Հյուսիսատլանտյան դաշինքի դռները բաց են պոտենցիալ անդամների համար: «Մեր դռները բաց են բոլոր նրանց համար, ովքեր իրենց ապագան կապում են ՆԱՏՕ-ի հետ»,-ասել է նա:

Ռասմուսենը նշել է, որ ռազմական այդ դաշինքին անդամակցությունը բացառապես ազգային ընտրություն է, և այդ ընտրության վրա չի կարող ճնշում գործադրվել դրսից:

Մինչդեռ, ինչպես նախօրյակին Bloomberg հեռուստաալիքին տված հարցազրույցում հայտարարել է ՌԴ-ի արտաքին գործերի նախարար Սերգեյ Լավրովը, Ռուսաստանը կտրականապես դեմ է Ուկրաինային ՆԱՏՕ-ի մեջ ներքաշելու փորձերին:

«Ուկրաինային ՆԱՏՕ-ի մեջ ներքաշելու փորձերը խիստ բացասական կլինեն եվրոպական անվտանգության ողջ համակարգի համար, և մենք կտրականապես դեմ կլինեինք դրան»,-ընդգծել է նա: Նախարարը հավելել է, որ այդ հարցը վերաբերում է ոչ միայն Ուկրաինային ու ՆԱՏՕ-ին, այլև Ռուսաստանին, հաղորդել է ԻՏԱՌ-ՏԱՍՍ-ը: