Ուկրաինացիների մեծամասնությունը պատրաստ է նախագահական ընտրություններում քվեարկել Պյոտր Պորոշենկոյի օգտին

Ուկրաինայի՝ ընտրելու իրավունք ունեցող բոլոր այն քաղաքացիների 54,7 տոկոսը, ովքեր պատրաստ են գնալ ընտրություններին և ճշտել են իրենց դիրքորոշումը երկրի նախագահի թեկնածուի հարցում, քվեարկելու են գործարար Պյոտր Պորոշենկոյի օգտին: Այդ մասին վկայում են «Ուկրաինայի բնակչության ընտրական տրամադրությունները նախագահական ընտրություններից երկու շաբաթ առաջ» սոցիոլոգիական հետազոտության արդյունքները:

Այն ապրիլի 29-ից մինչև մայիսի 11-ն անցկացրել է Կիևի սոցիոլոգիայի միջազգային ինստիտուտը:

Ընտրություններում կողմնորոշված քաղաքացիներից «Բատկիվշչինա» կուսակցության առաջնորդ Յուլյա Տիմոշենկոյի օգտին պատրաստ են իրենց ձայնը տալ հարցման մասնակիցների 9,6 տոկոսը, ժողովրդական պատգամավոր Սերգեյ Տիգիպկոյի օգտին՝ 6,7 տոկոսը, «Քաղաքացիական դիրքորոշում» կուսակցության առաջնորդ Անատոլի Գրիցենկոյի օգտին՝ 6,5 տոկոսը:

Դրա հետ մեկտեղ հարցվածների ընդհանուր թվից Պորոշենկոյի օգտին պատրաստ են իրենց ձայնը տալ 33,7 տոկոսը, Տիմոշենկոյի օգտին՝ 5,9 տոկոսը, Տիգիպկոյի օգտին՝ 4,1 տոկոսը, իսկ Գրիցենկոյի օգտին՝ 4,0 տոկոսը: Հարցման մասնակիցների 25,4 տոկոսը հայտարարել են, որ մտադիր չեն մասնակցել ընտրություններին, 13 տոկոսը դժվարացել են պատասխանել, այսինքն՝ չեն կողմնորոշվել այն թեկնածուի հարցում, որի օգտին մտադիր են քվեարկել:

Հետազոտության ընթացքում անհատական հարցազրույցի մեթոդով հարցվել է 2022 քաղաքացի, որոնք բնակվում են Ուկրաինայի բոլոր մարզերի 110 բնակավայրերում, հաղորդել է «Ինտերֆաքսը»: