«Եվրասիական միությունը ԽՍՀՄ-ի վերականգնում չէ». ռուս փորձագետ

Թեպետ անընդհատ շրջանառվում է այն տեսակետը, որ, Եվրասիական միություն ստեղծելով, Ռուսաստանի Նախագահ Վլադիմիր Պուտինը ցանկություն ունի վերականգնել ԽՍՀՄ-ն, իրականում դա այնքան էլ այդպես չէ. «Եվրասիական ինտեգրումն ու Եվրասիական միության ստեղծումը ամենևին ԽՍՀՄ-ի վերականգնում չէ, այլ ավելի շատ եվրոպական ինտեգրացիոն գործընթացի տեղափոխություն` հետխորհդային տարածք»,- «Կովկաս 2013» միջազգային գիտաժողովի ժամանակ նման տեսակետ հայտնեց «Ռուսաստանը համաշխարհային քաղաքականության մեջ» ամսագրի գլխավոր խմբագիր Ֆյոդոր Լուկյանովը` հավելելով, որ Եվրասիական միությունը ինքնորոշման և ինքնության փնտրտուք է' որ տալիս է ամենակարևոր հարցի պատասխանը' ո՞վ ենք մենք, և ո՞վ է մեզ հետ:

Անդրադառնալով Ռուսաստանի քաղաքականությանը, Լուկյանովը առանձնացրեց հատկապես արտաքին քաղաքական կյանքում ՌԴ-ի ունեցած հաջողություններն ու, մասնավորապես, Պուտինի «սիրիական գամբիտը», երբ Ռուսաստանին հաջողվեց որոշ չափով մեղմել սիրիական ճգնաժամն ու թույլ չտալ ԱՄՆ-ին պատերազմ սկսել Մերձավոր Արևելքում: Ըստ նրա` բացի «սիրիական գամբիտից», 2013թ. առանձնացավ նաև գաղափարախոսական առումով` ինքնության փնտրտուքով, ու Ռուսաստանը հայտարարեց, որ պահպանողական գաղափարախոսության հետևորդ է: Հենց այդ գաղափարախոսությունն էլ կարող է ապագայում արտաքին քաղաքական կյանքում որոշ փոփոխությունների բերել:

Լուկյանովի խոսքով' սակայն, մինչ այդ փոփոխությունները, 2013թ. ևս մեկ գաղափարախոսություն դարձավ օրակարգային Ռուսաստանի արտաքին քաղաքական կյանքում, այն է` Ռուսաստանը հետխորհրդային տարածաշրջանում պետք է բարձրացնի իր ազդեցությունը: Կարճ ժամանակահատվածում այդ գաղափարախոսությունը դարձավ իրականություն, և այսօր Ռուսաստանը կարողացավ հասնել հետխորհրդային տարածաշրջանում իր ազդեցությունը վերագտնելու ամենաբարձր կետին:

«Նախորդ տարի ՌԴ-ն արել է ամեն ինչ, որպեսզի վերականգնի իր ազդեցությունը հետխորհդային տարածաշրջանում: Կարծիքներ էին հնչել, որ Մոսկվան կփորձի ամրապնդել և կապիտալացնել այն ձեռքերումները, որոնք առկա են հետխորհդային տարածաշրջանում»,- նշեց «Ռուսաստանը համաշխարհային քաղաքականության մեջ» ամսագրի գլխավոր խմբագիրը: