«Սևոլ» լաստանավի խորտակման հետևանքով զոհվածների թիվը հասել է 284-ի

Աշխարհ 16 Մայիս, 2014 16:16

Խորտակված «Սևոլ» լաստանավի երրորդ և չորրորդ տախտակամածների վրա կատարված որոնողական աշխատանքների ընթացքում ջրասուզակները հայտնաբերել են ևս երեք մարդու մարմին, ներառյալ անձնակազմի անդամ Յան Դե Հոնին: Արդյունքում՝ ողբերգության զոհերի հաստատված թիվը հասել է 284-ի, ևս 20 մարդ համարվում է անհայտ կորած: Այդ մասին հայտնել են կառավարության՝ Չինդո կղզում գործող օպերատիվ շտաբի ներկայացուցիչները:

Շուրջօրյա հերթափոխային աշխատանքից կուտակված հոգնածության, քեսոնյան հիվանդության և վնասվածքների հետևանքով 13 քաղաքացիական ջրասուզակներ, որոնց վրա էր ընկած հիմնական ծանրաբեռնվածությունը, ժամանակավորապես դադարեցրել են որոնումները խորտակված նավի շրջանում: Նրանց հետ միասին աղետի վայրից մեկնել է նաև այն նավերից մեկը, որոնցից նրանք սուզվում էին ջրի տակ:

Ընդամենը որոնողական աշխատանքներին մասնակցում է շուրջ 120 ջրասուզակ, որոնք պատկանում են Ծովային ոստիկանության ազգային գործակալությանը, ռազմածովային ուժերին և մասնավոր ֆիրմաներին:

«Մի քանի օրվա ընթացքում փոխարինման կգա նոր նավ, իսկ հոգնած ջրասուզակները երկու-երեք օր հետո կվերադառնան իրենց պարտականությունների կատարմանը»,-հայտնել է շտաբի ներկայացուցիչը:

Նախօրյակին ոչ կանխամտածված սպանության մեղադրանքներ են առաջադրվել խորտակված «Սևոլ» լաստանավի անձնակազմի չորս անդամների, ՝ ներառյալ նավապետին: Դատախազներն այդ որոշումն են ընդունել նավապետի, նրա երկու օգնականների, ինչպես նաև գլխավոր ինժեների նկատմամբ՝ խորտակվող լաստանավից հարյուրավոր ուղևորների տարհանումից հրաժարվելու համար:

Ինչհոն նավահանգստից Չեջուդո կղզի մեկնող «Սևոլ» լաստանավը՝ 6 հազար 825 տոննա ջրատարողությամբ, ջրասույզ է եղել ապրիլի 16-ին Կորեական թերակղզու հարավարևմտյան վերջավորության մոտ: Նավում եղել են 476 ուղևոր և անձնակազմի անդամ, ընդ որում նրանց մեծ մասը Անսան քաղաքի դպրոցներից մեկի բարձրդասարանցիներ էին: Նավաբեկությունից հաջողվել է փրկվել 172 մարդու:

Ավելի վաղ հաղորդվել է, որ լաստանավի անձնակազմի երեք անդամներ հետմահու արժանացել են Կորեայի Հանրապետության հերոսի կոչման: Այդ բարձր պարգևը նրանք վաստակել են նրանով, որ քաջություն են ցուցաբերել և զոհաբերել իրենց խորտակվող նավի ուղևորներին փրկելու համար: ՀԿ-ի հերոսներ են դարձել 22-ամյա Պակ Չի Յոնը, 28-ամյա Չոն Հյոն Սոնը և նրա 28-ամյա փեսացուն՝ Կիմ Գի Ունը, որը ժամանակավոր աշխատանքի էր տեղավորվել լաստանավում, որպեսզի հարսնացուի կողքին լիներ:

«Այդ մարդիկ հերոսական արարք են կատարել՝ նավի վրա մնալով մինչև վերջին հնարավորությունը, որպեսզի փրկեն ուղևորներին»,- նշել է Հարավային Կորեայի կառավարության ներկայացուցիչը, հաղորդել է ԻՏԱՌ-ՏԱՍՍ-ը: