Իսրայելի վարչապետը կոչ է արել խստություն դրսևորել Իրանի հետ ընթացող բանակցություններում

Իսրայելի վարչապետ Բենիամին Նաթանյահուն Իրանին մեղադրել է իր միջուկային ծրագրի սահմանափակման գծով միջազգային պարտավորությունները խախտելու մեջ և կոչ է արել «մեծ տերություններին, որոնք շեշտը դրել են ճգնաժամի դիվանագիտական կարգավորման վրա, ատոմային զենք ստեղծելու հնարավորություն չտալ «այաթոլլաների ռեժիմին»:

Կառավարության ղեկավարը, որը մայիսի 16-ին Երուսաղեմում ընդունել է Պենտագոնի ղեկավար Չաք Հեյգելին, պարբերաբար հայտարարում է, թե անթույլատրելի է Իրանի վրա ճնշումը թուլացնելը, քանի դեռ նա ամբողջովին չի հրաժարվել միջուկային վառելիքի ինքնուրույն արտադրությունից:

«Իրանի հետ բանակցությունների առաջխաղացման համեմատ համաշխարհային հանրակցությունը, կարծում եմ, պետք է ղեկավարվի մեկ սկզբունքով՝ այաթոլլաներին չի կարելի թույլ տալ հաղթել: Չի կարելի Իրանին թույլ տալ… միջուկային զենք ստեղծելու կարողություն ձեռք բերել»,-հավելել է նա Հեյգելի հետ բանակցություններից առաջ մամուլի համար արված հայտարարության մեջ:

Պենտագոնի ղեկավարը հավաստիացրել է, որ ԱՄՆ-ի վարչակազմը հավատարիմ է իր պարտավորությանը՝ թույլ չտալու Իրանում միջուկային զենքի ստեղծումը: «Ամերիկան ամեն ինչ կանի՝ կատարելու այդ պարտավորությունը»,-ասել է նա:

2013 թվականի նոյեմբերին «վեցյակը» և Իրանը Ժնևում պայմանավորվել են Իրանի նկատմամբ ԱՄՆ-ի և ԵՄ-ի պատժամիջոցների մասնակի դադարեցման դիմաց իրանական միջուկային ծրագրի ժամանակավոր սահմանափակման շուրջ: Դրա հետ մեկտեղ մինչև հուլիսի 20-ը պետք է մշակվի համապարփակ համաձայնագիր, որը կերաշխավորի իրանական միջուկային ծրագրի ռազմական բաղադրիչի բացակայությունը:

Այսօր ավելի վաղ ամերիկացի դիվանագետներից մեկը հայտնել է, որ Իրանի և «վեցյակի» բանակցությունները Վիեննայում ծանր են ընթանում: ԱՄՆ-ի պատվիրակության ներկայացուցչի խոսքով՝ այս փուլում քննարկումները «ծանր ու դանդաղ» են անցնում: «Կողմերի դիրքորոշումներում լուրջ տարաձայնություններ են պահպանվում»,-ասել է դիվանագետը:

«Մենք անհանգստացած են առաջընթացի բացակայությունից, քանի որ ավելի ու ավելի քիչ ժամանակ է մնում,-նշել է նա:-Իրանին հարկ կլինի ընդունել մի շարք ոչ դյուրին որոշումներ», հաղորդել է ՌԻԱ Նովոստին: