Ամերիկացի կոնգրեսականը մեղադրվում է Ադրբեջանի հետ կոռուպցիոն գործարքի մեջ

ԱՄՆ-ի Թենեսի նահանգի Ներկայացուցիչների պալատի անդամ, հանրապետական Ջո Թոունսը մեղադրվում է Ադրբեջանի շահերի օգտին լոբբի անցկացնելու համար 10 հազար դոլար կաշառք ստանալու մեջ: Այս մասին հայտնում է Channel5 հեռուստաալիքը:

Ջո Թոունսը Ներկայացուցիչների պալատի քննարկմանն է ներկայացրել ԱՄՆ-ի կողմից Ադրբեջանին, որպես Եվրոպայի էներգետիկ անվտանգություն «ապահովող» և Աֆղանստանում խաղաղարար գործողությանն աջակցող, ԱՄՆ-ի ռազմավարական դաշնակից երկրի, պաշտպանելու կարևորությունն ընդգծող բանաձև: Փաստաթղթում նաև ասվում է, որ ղարաբաղյան հակամարտությունը շարունակում է սպառնալ տարածաշրջանում խաղաղությանն ու կայունությանը և կոչ անում ԱՄՆ-ին մեծացնել այն կարգավորելու ջանքերը:

Հեռուստաալիքը փորձել է պարզել, թե ինչու է սևամորթ կոնգրեսականն նման անակնկալ բանաձև առաջադրել և ինչ հետաքրքրություններ է նա հետապնդում:

Հեռուստաալիքի հետ զրույցում Ջո Թոունսն անսպասելիորեն խոստովանել է, որ բանաձևի տեքստը ստացել է ԱՄՆ-ում Ադրբեջանի դեսպանատանը, դրա հետ միասին հերքելով, որ որևէ անձնական շահ է հետապնդել:

Հեռուստաալիքը սեփական հետաքննությունն է անցկացրել և պարզել, որ բանաձևի առաջադրումից երկու շաբաթ առաջ Թոունսը հանդիպումներ է ունեցել ԱՄՆ-ում ադրբեջանական համայնքի ներկայացուցիչների հետ, ովքեր նրա ընտրական արշավի համար 10 հազար դոլար են նվիրաբերել:

Կոնգերսական Թոունսը սկզբունքորեն չի հերքել իր ընտրական արշավի համար միջոցներ հավաքագրելու մասին լուրը, սակայն, հրաժարվել է նշել, թե հատկապես որ կազմակերպությունից է ստացել այդ 10 հազար դոլարը:

Հեռուստաալիքին հաջողվել է պարզել, որ ադրբեջանամետ կոնգրեսականի ընտրական արշավի համար միջոցները փոխանցել են Հյուստոնում գտնվող ադրբեջանա-թուրքական մշակութային կենտրոնի անդամները: Կենտրոնի 7 անդամները միջին հաշվով 100-1500 դոլար են փոխանցել կոնգրեսմենի ընտրական արշավի համար:

Հեռուստաալիքը նաև հայտնել է, որ այդ մշակութային կենտրոնը կազմակերպում է կոնգրեսական Թոունսի պարբերական այցերը Բաքու:

Ամերիկացի կոնգրեսականի` Ադրբեջանի հետ կոռուպցիոն գործարքի մասին հեռուստաալիքի բացահայտումը մեկ անգամ ևս վկայում է այն մասին, որ Բաքուն մեծ ֆինանսական միջոցներ է ներդնում ԱՄՆ-ի տարբեր նահանգներում ադրբեջանամետ բանաձևեր առաջ տանելու համար, ինչի վկայություններից մեկն էլ այն է, որ ամերիկյան որոշ նահանգներ անհեթեթ բանաձևեր են ընդունում` կապված ղարաբաղյան պատերազմի ժամանակ տեղի ունեցած ողբերգական իրադարձությունների հետ: