Վիետնամից ՉԺՀ-ի 4 հազար քաղաքացու են տարհանել` հակաչինական ավերումների պատճառով

Մայիսի 19-ի դրությամբ Վիետնամից ՉԺՀ-ի 4 հազար քաղաքացու են տարհանել` երկրում տեղի ունեցած հակաչինական ավերումների պատճառով: Այդ մասին հաղորդել են տեղական ԶԼՄ-ները: Իր քաղաքացիներին հայրենիք վերադարձնելու համար կառավարությունը կազմակերպել է մի քանի չարտերային չվերթ և ուղարկել հատուկ նավեր:

Նախօրյակին Չինաստանի արտաքին քաղաքական գերատեսչությունը հայտարարել է, որ Վիետնամում տեղի ունեցած անկարգությունները «խախտել են չին-վիետնամական պարտավորագրերի և համագործակցության ոգին ու պայմանները», և ստեղծված իրադրության կապակցությամբ ՉԺՀ-ի կառավարությունը խորհուրդ է տալիս իր քաղաքացիներին «ժամանակավորապես ձեռնպահ մնալ Վիետնամ ուղևորություններից»:

ՉԺՀ-ի ԱԳ նախարարությունը հայտարարել է, որ «Չինաստանը կասեցնում է Վիետնամի հետ երկկողմ ծրագրերի մի մասի իրագործումը»:

Չինաստանի տուրիստական ընկերությունները կոչ են արել երկրի քաղաքացիներին ժամանակավորապես հրաժարվել Վիետնամ շրջագայություններից, իսկ մի քանիսը նույնիսկ դադարեցրել են այդ ուղղությամբ ուղեգրերի վաճառքը:

Վիետնամում տեղի ունեցած անկարգությունների հետևանքով զոհվել է Չինաստանի երկու քաղաքացի, տուժել են ավելի քան հարյուրը, հաղորդել է ԻՏԱՌ-ՏԱՍՍ-ը: