Նիգերիայում առևանգված դպրոցականների որոնումներին միացավ նաև բրիտանական հետախույզ ինքնաթիռը

«Բոկո Հարամ» ծայրահեղական խմբավորման կողմից առևանգված հարյուրավոր դպրոցական աղջիկների որոնողական աշխատանքներին մասնակցելու համար Նիգերիա է ժամանել Մեծ Բրիտանիայի Sentinel R1 հետախույզ ինքնաթիռը:

Ինքնաթիռի անձնակազմը բաղկացած է հինգ մարդուց. այն կարող է երկար ժամանակ օդում գտնվել մեծ բարձրությունների վրա: Մայիսի 18-ին Նիգերիա ուղարկված ինքնաթիռը կհետազոտի երկրի հյուսիսային տարածաշրջանը, որտեղ իսլամիստները, ինչպես ենթադրվում է, պահում են առևանգվածներին:

Հետախուզության մասնագետները հենց թռիչքի ժամանակ կուսումնասիրեն տեղանքի եռաչափ նկարահանումները, որոնք ռադարներից ստանում է ինքնաթիռը՝ ստուգելու հնարավոր հանցանշանները և կասկածելի տեղափոխությունները: Այդպիսի տեխնոլոգիաներ բրիտանացիները «լայնորեն օգտագործում էին Աֆղանստանում», նշել են մեկնաբանները: Տեղեկությունները կհաղորդվեն Նիգերիայի իշխանություններին:

Բրիտանական ինքնաթիռը կաջակցի որոնումներում ընդգրկված ամերիկյան օդուժի ջանքերին: Համարվում է, որ դրանցում գործի են դրված նաև ԱՄՆ-ի դրոնները:

Ավելի քան մեկ ամիս առաջ, ապրիլի 14-ին, «Բոկո Հարամ» ծայրահեղական խմբավորման զինյալները Նիգերիայի հյուսիս-արևելքում գտնվող Չիբոկ բնակավայրում պատանդ էին վերցրել 276 դպրոցական աղջիկների: Ոստիկանության տվյալներով՝ 53 դեռահասներ կարողացել են փախչել, 223-ը մինչ այժմ մնում են ելուզակների ձեռքում:

Ուսումնական հաստատության վրա հարձակումը «Բոկո Հարամը» բացատրում է նրանով, որ «արևմտյան կրթությունը պետք է դադարեցվի, իսկ աղջիկները պետք է թողնեն դպրոցը և մարդու գնան»: Լրատվամիջոցների տվյալներով՝ մայիսի 4-ին Նիգերիայի հյուսիս-արևմուտքում ծայրահեղականներն առևանգել էին ևս 11 դեռահաս աղջիկների:

Ներկայումս դպրոցական աղջիկների գտնվելու վայրը պարզելու և նրանց ազատելու համար արդեն մի ամբողջ միջազգային գործողություն է ծավալվել, հաղորդել է ԻՏԱՌ-ՏԱՍՍ-ը: