Ղարիբաշվիլին ՌԴ-ին շնորհակալություն է հայտնել` տարերային աղետի հետևանքների վերացման գործում աջակցելու պատրաստակամության համար

Վրաստանի վարչապետ Իրակլի Ղարիբաշվիլին շնորհակալություն հայտնում Ռուսաստանի կառավարությանը Դարիալի կիրճում տարերային աղետի հետևանքների վերացման գործում օգնություն ցուցաբերելու պատրաստակամության համար: Այդ մասին տեղեկացնում է «Գրուզիա Online»-ին, ասված է նախարարների կաբինետի ղեկավարի հատուկ հայտարարության մեջ:

«Մենք արդեն երրորդ օրն է՝ պայքարում ենք Դարիալի կիրճում տեղի ունեցած տարերային աղետի դեմ: Ցավոք, սողանքի հետևանքով մահացել է մեկ մարդ, կորած են համարվում 7-ը: Չնայած այն բանին, որ փրկարար ծառայության ներկայացուցիչներն օպերատիվ օգնություն են ցույց տվել Ուկրաինայի քաղաքացուն, և նա տեղափոխվել էր Վրաստանի լավագույն կլինիկաներից մեկը, նրա կյանքը փրկել չհաջողվեց: Վրաստանի կառավարությունն անկեղծ ցավակցություն է հայտնում զոհվածի ընտանիքին:

Վրացական պետության անունից ցանկանում եմ ռուսական կողմին մեծ շնորհակալություն հայտնել մեզ հետ համագործակցելու պատրաստակամության համար: Ստեղծված բարդ իրավիճակում նրանք օպերատիվ կերպով մեզ տեխնիկա են առաջարկել տարերային աղետի հետևանքները հաղթահարելու համար»,- ասել է Ղարիբաշվիլին:

Մայիսի 17-ի առավոտյան Վրաստանի տարածքում տեղի է ունեցել սառցախառը սելավ, որը փակել է Ռազմավիրական ճանապարհը և Թերեք գետի հունը: Դարիալի կիրճում «Կազբեկ» (Վրաստան) - «Վերին Լարս» (Ռուսաստան) սահմանապահ անցակետի աշխատանքը դադարեցված է ինչպես վրացական, այնպես էլ ռուսական կողմից: Սողանքը վթարային իրավիճակ է առաջացրել «Հյուսիս-Հարավ» մայր գազատարում, որով ռուսական գազը տարանցմամբ փոխադրվում է Հայաստան:

«Ըստ չհաստատված տեղեկատվության` ժայռի բեկորների տակ են հայտնվել բեռնատար ավտոմեքենաներ: Բացի դրանից, ըստ նախնական տեղեկատվության՝ սողանքի պահին թունելում, որտեղ տեղի էին ունենում շինարարական աշխատանքներ, նույնպես փլվածքների տակ է մնացել մի քանի անձ»,- ասված է Վրաստանի Անվտանգության և ճգնաժամերի կառավարման խորհրդի հայտարարության մեջ:

Դրանում նաև նշվում է, թե չնայած այն բանին, որ փրկարարները որոնողական աշխատանքներն անցկացնում են ինտենսիվորեն, շուրջօրյա ռեժիմով, ջրի մակարդակը գերազանցված է սողանքի զանգվածը բավականին մեծ է, ինչն իր հերթին խանգարում է առավել արդյունավետ աշխատանքներ իրականացնելուն:

Մաքրման աշխատանքներում, որոնք համակարգում է Վրաստանի ենթակառուցվածքի և տարածաշրջանային զարգացման նախարարությունը, ներգրավված է մինչև 20 միավոր ծանր տեխնիկա: