Ադրբեջանցիները փորձել են խանգարել «Մենք ենք մեր սարերը» արցախյան համույթի ռուսաստանյան հյուրախաղերին

Արցախի «Մենք ենք մեր սարերը» երգի պետական համույթն օրերս է վերադարձել Ռուսատանի Դաշնությունում ունեցած հյուրախաղերից, որոնք կայացել են տեղի հայ համայնքի ներկայացուցիչների հրավերով:

Ինչպես «Արցախպրես»-ի թղթակցի հետ զրույցում նշեց համույթի տնօրեն Սլավա Ապրեսյանը, հրավերն ստացվել է Սամարայի հայ համայնքի կողմից, և համույթն ապրիլ-մայիսին համերգաշարերով հանդես է եկել Տալյատիում, Սարատովում, Ուլյանովսկում, Կազանում և ՌԴ այլ քաղաքներում: Համույթի տնօրենի խոսքով` նման հրավերների արդյունքում` կոլեկտիվը տարին մեկ-երկու անգամ Ռուսաստանի Դաշնություն է մեկնում հյուրախաղերի և ամեն անգամ 7-8 համերգներ ունենում տարբեր քաղաքներում:

«Նման հյուրախաղերի նպատակն Արցախում ստեղծվող մշակույթի տարածումն է արտասահմանյան հանդիսատեսի շրջանում»,- նշեց Ս. Ապրեսյանը՝ հավելելով, որ այս տարվա սեպետեմբեր-հոկտեմբերին կրկին համերգաշարով հանդես կգան ՌԴ Խաբարովսկի, Ամուրի, Կրասնոյարսկի, Նովոսիբիրսկի, Տոմսկի մարզերի մի շարք քաղաքներում:

Համույթի տնօրենը նշեց նաև, որ արդեն մի քանի անգամ, հյուրախաղերի ընթացքում, ադրբեջանական համայնքի ներկայացուցիչների կողմից փորձեր են եղել խափանել համերգների կայացումը, սակայն ԼՂՀ և տեղի իշխանությունների գործադրած ջանքերի շնորհիվ, ինչպես նաև Ռուսաստանի հայերի միության նախագահ Արա Աբրահամյանի միջամտությամբ, նման բոլոր փորձերը ձախողվել են:

«Մենք ենք մեր սարեր»-ի տնօրենի տեղեկացմամբ, անցած տարի համույթի կողմից Բլագովեշենսկում և Խաբարովսկում տրվել են բարեգործական համերգներ, որից ստացված ողջ հասույթը փոխանցվել է ջրհեղեղից տուժած այդ բնակավայրերի վերականգման գործին, ինչը մեծ արձագանք է ստացել ռուս հասարակության շրջանում:

Անդրադառնալով առաջիկա ծրագրերին` Ս. Ապրեսյանը տեղեկացրեց, որ «Մենք ենք մեր սարերը» երգի պետական համույթն ընթացիկ ամսվա մեջ պատրաստվում է Իրանի հայ համայնքի հրավերով, Հայաստանի առաջին Հանրապետության օրվան նվիրված համերգաշարով, մեկնել ԻԻՀ տարբեր քաղաքներ: