ՉԺՀ-ի իշխանություններն արգելել են Windows 8-ի տեղակայումը պետական համակարգիչներում

ՉԺՀ-ի իշխանություններն արգելել են պետական մարմինների կողմից օգտագործվող նոր համակարգիչներում Միացյալ Նահանգների Microsoft ընկերության Windows 8 գործառնական համակարգի տեղակայումը: Այդ մասին մայիսի 20-ին հաղորդել է Սինհուա գործակալությունը՝ վկայակոչելով ՉԺՀ-ի պետական գնումների կենտրոնի հայտարարությունը:

ՉԺՀ-ի պետական գնումների պաշտոնական կայքում մայիսի 16-ին զետեղվել է հայտարարություն, որում ասված է, թե պետական հիմնարկների կողմից օգտագործվող սեղանի և պլանշետային ցանկացած համակարգիչներում, ինչպես նաև նոութբուքերում արգելվում է Windows 8 գործառնական համակարգի տեղակայումը: Դրա փոխարեն հիշյալ տեսակների սարքերում պետք է տեղակայվեն ցանկացած այլ գործառնական համակարգեր:

Հաղորդագրության մեջ նշված չէ, թե նման միջոցները կապված են արդյոք հինգ չինացի զինվորականների հասցեին կիբեռլրտեսության մեղադրանքների հետ, որոնք մայիսի 19-ին հրապարակել է ԱՄՆ-ի արդարադատության նախարարությունը:

Չնացի զինվորականները մեղադրվում են ԱՄՆ-ի այն վեց ֆիրմաների առևտրային գաղտնիքները գողանալու մեջ, որոնք գործունեություն են ծավալում միջուկային և արեգակնային Էներգետիկայի և մետաղագործության ոլորտներում: Դրանց թվում են Alcoa և Westinghouse Electric ընկերությունները: ՉԺՀ-ի ԱԳ նախարարությունն, իր հերթին, հայտարարել է, որ ԱՄՆ-ի մեղադրանքները «մտացածին են և կվնասեն չին-ամերիկյան հարաբերություններին և երկրների փոխադարձ վստահությանը»: ՉԺՀ-ի իշխանությունները նաև հիշեցրել են, որ երկիրն արդեն բազմիցս ժխտել է Միացյալ Նահանգների իշխանությունների մեղադրանքները: Բացի դրանից, նախարարությունն ԱՄՆ-ից պահանջել է «անհապաղ ուղղել սխալը», հաղորդել է ՌԻԱ Նովոստին: