Սերբիայում եռօրյա սուգ է հայտարարվել ջրհեղեղի հետևանքով զոհվածների հիշատակին

Սերբիայում մայիսի 21-ից մինչև 23-ը եռօրյա սուգ է հայտարարվել ջրհեղեղի հետևանքով զոհվածների հիշատակին: Այդ մասին հայտնել է Սերբիայի վարչապետ Ալեքսանդար Վուչիչը կառավարության՝ մայիսի 20-ին կայացած հատուկ նիստում: Վուչիչն այն կարծիքին է, որ ջրհեղեղը «Սերբիային տասն անգամ ավելի ուժեղ է հարվածել, քան տարածաշրջանի մյուս երկրներին»: Դրա հետ մեկտեղ նա հույս է հայտնել, որ դա չի վերաբերի զոհերի թվին:

Զոհվածների ընդհանուր թվի վերաբերյալ տվյալներ դեռևս չկան, սակայն հայտնի է, որ միայն Օբրենովաց քաղաքում, որը մյուսներից ավելի է տուժել տարերքի մոլեգնումից, հայտնաբերվել է 14 զոհված: Ջրհեղեղի կապակցությամբ Սերբիայից արդեն տարհանվել է ավելի քան 30 հազար մարդ, որոնցից 13,6 հազարից ավելին դուրս են բերվել Օբրենովաց քաղաքից:

Վուչիչի խոսքով՝ նյութական վնասը «հսկայական է»: Ինչպես սպասվում է, այն կգերազանցի երկրի ՀՆԱ-ի 0,64 տոկոսը, և ավերվածը վերականգնելու համար օգնություն կպահանջվի արտասահմանից: Դրա հետ մեկտեղ վարչապետը խոստացել է, որ «մարդկանց կփոխհատուցեն նրանց բոլոր կորուստները»:

Մայիսի 15-ից երկրում արտակարգ դրություն է սահմանվել: Ինչպես հայտարարել է վարչապետը, այն չեղյալ հայտարարելու հարցը կքննարկի մայիսի 23-ից ոչ շուտ:

Հարևան Բոսնիայում և Հերցեգովինայում մայիսի 20-ը սգո օր է հեղեղման հետևանքով զոհվածների հիշատակին: Շենքերին խոնարհված են պետական դրոշները, չեղյալ են հայտարարված բոլոր համերգային-ժամանցային միջոցառումները, փոփոխություններ են մտցված հեռուստատեսային ալիքների հաղորդումների ցանցում:

Ըստ ոստիկանության տվյալների՝ Բոսնիայում և Հերցեգովինայում հեղեղման զոհ է դարձել առնվազն 17 մարդ, նրանց ինքնությունը պարզված չէ: Եվս 7 քաղաքացի համարվում է անհայտ կորած: Ըստ որում նշվում է, որ զոհվածների իրական թիվը կարող է շատ ավելի մեծ լինել, բայց այն հայտնի կլինի միայն այն բանից հետո, երբ ջուրն ամբողջովին հետ կքաշվի:

Ինչպես հայտարարել է երկրի արտաքին գործերի նախարար Զլատկո Լագումջիան, «այս տարերային աղետից վնասը զուգադրելի է միայն պատերազմի հետ»: Հեղեղումների և սողանքների պատճառով այս կամ այն կերպ տուժել է ավելի քան մեկ միլիոն մարդ՝ շուրջ 4 միլիոն բնակչությամբ պետության բնակիչների մեկ քառորդը:

Նրա խոսքով՝ ավելի քան 100 հազար բնակելի տուն քանդվել է կամ դարձել ոչ պիտանի բնակության համար, ոչնչացված են առնվազն 230 դպրոց և բուժհիմնարկություն: «Սողանքները բառացիորեն կլանել են մի քանի տասնյակ բնակավայրեր, ավտոմոբիլային ճանապարհների և երկաթուղիների հատվածներ»,- ասել է Լագումջիան: Նա հավելել է, որ առայժմ «դժվար է կանխատեսել», թե որքան երկար կտևեն վերականգնողական աշխատանքները, հաղորդել է ԻՏԱՌ-ՏԱՍՍ-ը: