Ադրբեջանում զինվորը կրակել է իր վրա

Ադրբեջանի զինված ուժերի ներքին զորքերի զինվորը կրակել է իր վրա: Դա տեղի է ունեցել Սումգայիթում տեղակայված զորամասերից մեկում:

19-ամյա զինվոր Սադիգ Վալեհ օղլու Հագվերդիևը վիրավորվել է իրեն ամրակցված զենքի կրակոցից: Նա տեղափոխվել է հիվանդանոց: Ս. Հագվերդիևը զինծառայության է կանչվել Սաաթլըի շրջանից:

Մայիսի 21-ի լույս 22-ի գիշերը ղարաբաղա-ադրբեջանական հակամարտ զորքերի շփման գծի հարավային ուղղությամբ տեղակայված մարտական դիրքերի ուղղությամբ հակառակորդը ձեռնարկել է հետախուզադիվերսիոն ներթափանցման փորձ: Լեռնային Ղարաբաղի Հանրապետության պաշտպանության նախարարության մամուլի ծառայությունը հայտնել է, որ պաշտպանական բանակի սոտրաբաժանումները դիմել են պատասխան գործողությունների և հակառակորդին հետ շպրտել ելման դիրքեր:

Ադրբեջանական APA լրատվական գործակալությունը' հղում կատարելով Ադրբեջանի ՊՆ մամուլի ծառայությանը, հաղորդել է, որ այդ բախման ժամանակ վիրավորվել են ադրբեջանական բանակի ենթասպա Մուրադ Ասիֆ օղլու Մամեդովը, զինվորներ Թուրալ Էլդար օղլու Իսագովը և Մրզա Ասիֆ օղլու Միրզալին, որոնք տեղափոխվել են հոսպիտալ:

Ադրբեջանը մշտապես հերքում է առաջնագծում իրագործած դիվերսիոն գործողություններից հետո ունեցած իր կորուստները: Որպես կանոն, այդ կորուստները ադրբեջանական կողմը միջադեպերին հաջորդող օրերին ներկայացնում է ինքնասպանության, անվտանգության կանոնների խախտման, անզգուշության, հիվանդության կամ ճանապարհատրանսպորտային պատահարի արդյունք:

Ադրբեջանական ԶԼՄ-ների հաղորդումների համաձայն, 2014 թ. սկզբից մինչև այժմ ադրբեջանական բանակում կորուստը կազմել է 32 զինծառայող, որոնցից 23-ը զոհվել են ոչ մարտական պայմաններում, 54 զինծառայող էլ վիրավորվել կամ տարբեր աստիճանի վնասվածքներ են ստացել: