Ռազմական դրություն է մտցվել հռչակված Լուգանսկի ժողովրդական հանրապետությունում

Ռազմական դրություն է մտցվել հռչակված Լուգանսկի ժողովրդական հանրապետությունում: Այդ մասին ԻՏԱՌ-ՏԱՍՍ-ին հայտնել են հանրապետության մամուլի կենտրոնում:

Ավելի վաղ մարզային միլիցիայի ներկայացուցիչները հայտնել են, որ մայիսի 22-ի առավոտից Ուկրաինայի ազգային գվարդիայի մարտիկների և հարավ-արևելքի բանակի միջև բախումներ են ընթանում Ռուբեժնոյե և Լիսիչանսկ քաղաքների շրջանում: Նշվում է, որ մարտերի ընթացքում պայթեցվել է Սևերսկի Դոնեց գետի վրայով անցնող կամուրջը: «Այժմ մարտերը շարունակվում են»,-ասել է Լուգանսկի մարզի ՆԳ նախարարության վարչության ներկայացուցիչը, հավելելով, որ ուկրաինացի ուժայինների մեջ կան վիրավորներ:

Լուգանսկի մարզի ժողովրդական նահանգապետ Վալերի Բոլոտովը նախօրյակին հայտարարել է, որ հռչակված Լուգանսկի ժողովրդական հանրապետության կառավարությունը պատրաստ է Կիևի հետ բանակցությունների սեղանի շուրջ նստել միայն այն դեպքում, եթե Կիևի իշխանությունները դադարեցնեն պատժիչ գործողությունը: «Մենք կտրականապես պահանջում ենք բոլոր զինված ստորաբաժանումներն անհապաղ դուրս բերել հանրապետության տարածքից,-նշել է նա:-Մենք պատրաստ ենք բանակցել, բայց միայն մեր պետության դեմ Ուկրաինայի ագրեսիայի դադարեցումից հետո»: Բոլոտովը Ուկրաինայի հարավ -արևելքում շարունակվող ուժային գործողությունը, որն իրականացվում է Կիևի ենթակայության տակ գտնվող զորամասերի ու զինված կազմավորումների կողմից, որակել է բռնազավթում և «ահաբեկչություն տեղի բնակչության դեմ»:

Մինչդեռ ՈՒկրաինայի նախագահի պաշտոնակատար, Գերագույն ռադայի խոսնակ Ալեքսանդր Տուրչինովը հայտարարել է, թե Կիևը պատրաստ է երկրի արևելքում ուժային գործողության «եզրափակիչ փուլին»: Նրա խոսքով՝ բանակը պատրաստ է Դոնեցկի և Լուգանսկի մարզերը մաքրել անջատականներից և այնտեղ մայիսի 25-ին ապահովել նախագահական ընտրությունների անցկացումը: