Արաբական Միացյալ Ամիրայությունները նավթի օրական արդյունահանումը կհասցնի 3,5 մլն բարելի

Արաբական Միացյալ Ամիրայությունները (ԱՄԱ) մինչև 2017 թվականը նավթի արդյունահանումը կավելացնի 25 տոկոսով՝ օրական 2,8 մլն բառելից հասցնելով մինչև 3,5 մլն բարելի: Այդ մասին ԻՏԱՌ-ՏԱՍՍ-ին տված հարցազրույցում ասել է ԱՄԱ-ի Էներգետիկայի նախարար Սուհայիլ Մոհամեդ Ֆարաժ ալ Մազրուեյը:

«Լրացուցիչ մատակարարումների մի մասը կգնա համաշխարհային շուկա, մյուս մասը՝ մեր նավթավերամշակման գործարաններ»,-բացատրել է նա:

Արտադրության ավելացման նպատակը, նախարարի խոսքով, պահանջարկը բավարարելն է, որն աճում է ոչ միայն Տնտեսական համագործակցության և զարգացման կազմակերպության երկրներում, այլև Նավթ արտահանող երկրների կազմակերպության պետություններում, որոնք զարգացնում են սեփական նավթավերամշակումը: «Պահանջարկն աճում է, իսկ առանձին արտադրողների հնարավորություններն արդեն հասել են բարձրակետին»,-նշել է նա: