Եվրախորհրդարանի ընտրությունները նշանավորվել են եվրոսկեպտիկների հաջողությամբ

Եվրախորհրդարանի ընտրությունները, որոնք անցկացվել են մայիսի 22-ից մինչև 25-ը, պահպանել են եվրաինտեգրացման կողմնակից խոշորագույն կուսակցությունների` աջ կենտրոնամետների, սոցիալիստների և լիբերալների առաջատար դիրքերը, բայց քաղաքական ծանրքաշայիններին վախեցրել են եվրոսկեպտիցիզմի նկատելի աճով, ինչն առավել ցայտուն է դրսևորվել Ֆրանսիայում ծայրահեղ աջ «Ազգային ճակատի» հաղթանակով:

Եվրոպայի` ձայնի իրավունք ունեցող 400 մլն քաղաքացիներից ընտրատեղամասեր է եկել 43,09 տոկոսը՝ 2009 թվականի 43 տոկոսի դիմաց: Չնայած այն բանին, որ ցուցանիշը մնում է չափազանց ցածր, եվրոպամետները հաղթանակ են տոնում. ընտրություններին մասնակցությունը առաջին անգամ աճել է եվրոպական ընտրությունների ողջ պատմության ընթացքում:

Ինչպես վկայում էին կանխատեսումները, այս ընտրությունները նշանավորվել են եվրոսկեպտիկների հաջողությամբ: Ընդ որում առավել մեծ հաջողության են հասել ոչ թե պարզապես եվրաթերահավատները, այլ եվրատյաց քաղաքական ուժերը, որոնք հանդես են գալիս Եվրամիությունից և եվրոյի գոտուց իրենց երկրների դուրս գալու օգտին:

«Աջից ճեղքման» խորհրդանիշ է դարձել Մարին Լե Պենի «Ազգային ճակատի» ցուցաբերած արդյունքը, որին բաժին է ընկել Ֆրանսիայի 74 մանդատներից 22-ը: Ֆրանսիացի ազգայնականների առաջնորդն այժմ հնարավորություն ունի ստեղծել ու գլխավորել Եվրախորհրդարանի ամենաաջ խմբակցությունը, բայց դրա համար անհրաժեշտ կլինի համախմբել Եվրամիության այլ երկրներից համախոհներին:

«Եվրոպան հանուն ազատության և ժողովրդավարության» խմբակցությունը, որն այժմ Եվրախորհրդարանի ամենաաջ միավորումն է, ըստ ներկայիս գնահատումների` կստանա 36 տեղ` իր ներկայացուցչությունն ավելացնելով հինգ պատգամավորով: Եվ միայն նվազ արմատական «Եվրոպայի պահպանողականների ու բարենորոգիչների աջ խմբակցությունը», որը կիսով չափ բաղկացած է բրիտանական «Պահպանողական կուսակցության» անդամներից, կարող է 57-ից կրճատվել մինչև 44 մարդ:

Ծայրահեղ աջերի հաջողությունն ավելի շուտ պայմանական է: Խորհրդարանի պատգամավորների մեծամասնությունը, որի մեջ մտնում է 751 ժողովրդական ընտրյալ, կկազմեն ավանդական կուսակցությունները, և ծայրահեղ աջերը չեն կարողանա ազդել նրա որոշումների վրա: Սակայն դրանց արդյունքները կազդեն ազգային մակարդակով, որտեղ իշխող մեծամասնությանը հարկ կլինի հաշվի նստել ազգայնականների հետ:

Եվրախորհրդարանի կողմից հրապարակված նախնական տվյալների համաձայն՝ խոշորագույն կուսակցությունը մնացել է աջ կենտրոնամետ «Եվրոպայի ժողովրդական կուսակցությունը», թեև նրա պատգամավորների թիվը, ինչպես սպասվում է, 274-ից կկրճատվի մինչև 212: Նրան հաջորդում է ձախ կենտրոնամետ «Սոցիալիստների և դեմոկրատների առաջադիմական միությունը», որը ներկայիս 196 մանդատի փոխարեն կարող է ստանալ 186 մանդատ: Նախկինի պես երրորդ տեղն զբաղեցնում է ազատականների «Լիբերալների և դեմոկրատների միություն հանուն Եվրոպայի» միավորումը, որը, ինչպես ենթադրվ ում է, կստանա 70 պատգամավորական աթոռ: Սակայն լիբերալների խմբակցության առաջնորդ, Բելգիայի նախկին վարչապետ Գի Վերհովստադտը հայտարարել է, որ իր խումբը գործընկերների հետ բանակցություններ է վարում տարբեր երկրներում և ծրագրում է իր անդամների թիվը հասցնել 85-ի, հաղորդել է ՌԻԱ Նովոստին: